Qostanaı oblysynda karantınge qaramastan toı ótkizetinder azaımaı tur
Óńirlik shtabtyń otyrysynda qalalar men aýdandardaǵy epıdemıologııalyq ahýal baıandaldy. Koronavırýs indetine shaldyqqandardyń deni - Qostanaı qalasynyń turǵyndary. Sondyqtan oblys ortalyǵyndaǵy reıd sharalary ázir toqtamaıdy.
Alaıda karantıp talaptaryn buzý derekteri de azaımaı otyr. Qostanaılyqtar shekteý sharalaryna qaramastan toı ótkizip, otbasylyq otyrystar jasap keledi. Osy aptanyń ózinde karantın rejımin buzýdyń júzdegen deregi anyqtaldy.
Buǵan qosa taksılerdiń arasynda da shekteýdiń buzylýy tyıylar emes. Bas dárigerdiń qaýlysyn elemeı túnde jolaýshy tasymalymen aınalysqan 38 taksı júrgizýshisi anyqtaldy.
«Oblysta bir aptada 700-ge jýyq reıd ótkizilip, karantın talaby 405 márte buzylǵan. Naýyrzym, Amangeldi, Qamysty aýdandarynda monıtorıng toptardyń jumysy jetkiliksiz uıymdastyrylǵan. Erejeni eskermeı, otbasylyq mereke jasaýdyń 4 deregi Qostanaı qalasynda tirkelse, Jangeldın aýdanynda – 2, Áýlıekól, Qostanaı, Meńdiqara aýdandarynda - 1 fakti anyqtaldy. Beıimbet Maılın aýdanyndaǵy monıtorıng toby Novoılınov aýylynda as berý rásiminiń ústinen tústi. Otbasylyq is-sharaǵa 15 adam qatysqan, qonaqtardyń birazy Lısakov qalasynan arnaıy kelgen», delingen Óńirlik shtab aqparatynda.
Osyǵan baılanysty oblystyń aýdan-qalalaryndaǵy monıtorıng toptardyń jumysy qaıta kúsheımek. Shekteý sharalary epıdemıologııalyq jaǵdaı turaqtalǵan kezde ǵana jeńildeıdi.
Kópshilik jınalatyn oryndar jáne avtobýs aıaldamalarynda qaýipsizdik sharalaryn saqtaý erejeleri jazylǵan jadynamalar ilinedi.
Aıta keteıik, qazirgi ýaqytta oblysta naýqastardy emdeý isine 19 statsıonar jumyldyrylyp, onda 967 tósek-oryn ázirlengen. Qajettilik týyndaǵan jaǵdaıda tósek-oryn sany 3 myńǵa jetedi.
