Qostanaı oblysynda qar qursaýynda qalǵan balyqshylar qutqaryldy

QOSTANAI. QazAqparat – Qostanaı oblysynda balyq aýlaýǵa shyqqan birneshe adam boranda qalyp qoıǵan. Olardy TJD-nyń arnaıy jasaq qyzmetkerleri qutqardy, dep habarlaıdy QazAqparat oblystyq TJD Qoǵammen baılanys tobyna silteme jasap.

TJD kezekshi bólimine 27 jeltoqsan kúni keshki saǵat 20.20 shamasynda Uzynkól aýdanynda 4 jolaýshysy bar avtokóliktiń qar qursaýynda qalyp qoıǵany týraly habarlaǵan.

«Qostanaı qalasynyń turǵyndary Neklıýdov kóline balyq aýlaýǵa kelgeni anyqtaldy. Úılerine qaıtpaq bolyp, Qostanaı-Mamlıýtka respýblıkalyq trassasyna bet alady. Jolda olar mingen «VAZ 2110» markaly avtokólik qalyń qarǵa tap bolǵan. Tas jolǵa jetpeı, Utaqan aýylynan shamamen 10 shaqyrym jerde jeńil kólik synyp qalady. Balyqshylar qutqarýshylarǵa habar berip, kólik ishinde kútip otyrǵan. Olar jergilikti eldi mekendi nashar bilgendikten naqty ornalasqan jerin túsindire almaǵan. Qutqarý jumysyna qatty jel, boran kedergi jasady», delingen vedomstvo habarlamasynda.

Eki saǵat izdeý barysynda balyqshylar turǵan jer anyqtaldy. Olarǵa Uzynkól aýdanynyń TJ bóliminiń jáne Fedorov aýyldyq okrýgi ákimdiginiń qyzmetkerleri keldi. Qutqarýshylar kólikti Uzynkól aýylyna aparyp, jergilikti TJO aýmaǵynda qaldyrǵan. Balyqshylar kelesi kúni avtokólik jóndelgennen keıin úılerine oraldy.