Qostanaı oblysynda qant satyp alýǵa 850 mln teńge bólinedi

QOSTANAI. QazAqparat – Búgin Qostanaı oblysynyń ákimi Arhımed Muhambetov áleýmettik mańyzdy taýarlar, onyń ishinde qanttyń baǵasyn turaqtandyrý máselesi boıynsha jınalys ótkizdi. Bul týraly óńir basshysy óziniń Instagram akkaýntynda málim etti, dep habarlaıdy QazAqparat tilshisi.

Oblys ákiminiń aqparatyna saı, búgingi kúni azyq-túlik taýarlaryn turaqtandyrý qorynda qant bar, ol saýda jelileri arqyly satylymǵa shyǵarylady.

«Atalǵan saýda jelileri qantty shekteýli mólsherde ǵana satyp otyratyn bolady, bul taýardyń oblystan shyǵarylýyn boldyrmaıdy. Sonymen qatar «Azyq-túlik korporatsııasy» AQ arqyly jaqyn arada qant satyp alynady. Qosymsha basqa elderden qant kirgizý qarastyrylyp jatyr. Odan bólek, qant satyp alý úshin 850 mıllıon teńge kóleminde qarajat bólýge tapsyrma berdim», - dedi A. Muhambetov.

Onyń aıtýynsha, bul baǵytta óńirde birqatar shara qabyldanyp jatyr. Sonymen qatar qalalar men aýdandardyń ákimdigi áleýmettik mańyzy bar azyq-túlik taýarlaryna kúndelikti monıtorıng jasap otyr.

Avtory: Janna Musabaeva