Qostanaı oblysynda qandaı shekteý sharalary engizildi
QOSTANAI. QazAqparat – Qostanaı oblysynda koronavırýstyń taralýyna baılanysty qabyldanǵan shekteý sharalary týraly aımaq ákiminiń orynbasary Marat Júndibaev «Habar 24» telearnasyndaǵy onlaın-konferentsııa barysynda aıtty, dep habarlaıdy QazAqparat.
Ákim orynbasarynyń aıtýynsha, tótenshe jaǵdaı kezeńinde halyqtyń qaýipsizdigin qamtamasyz etý maqsatynda shekteý is-sharalaryn kúsheıtý engizildi.
«Oblys aýmaǵyna kirý-shyǵý qozǵalysy shekteldi. Qostanaı oblysynyń perımetri boıynsha 10 blokpost qoıyldy. Qqajet bolǵan jaǵdaıda taǵy 13 tosqaýyl beketin ornatamyz. Blokposttarda 204 qyzmetker jumys isteıdi. Onyń ishinde 159 polıtseı, 32 medıtsına qyzmetkeri, 3 jergilikti atqarýshy organnyń ókili, 10 veterınarııa qyzmetkeri bar. Mobıldi toptardyń qyzmetkerleri jeke qorǵaný quraldarymen (maskalar, qolǵaptar, halattar), jumysqa arnalǵan termometrlermen qamtamasyz etilgen. Maskalardy aýystyrý árbir eki saǵat saıyn júzege asyrylady», - dedi oblys ákiminiń orynbasary.
Qazir qala kóshelerin, aıaldamalardy jáne jolaýshylar avtobýstaryn dezınfektsııalaý júrgizilýde. Qostanaı oblysynyń bas memlekettik sanıtarlyq dárigeriniń qaýlysymen birneshe talaptar tizbesi bekitildi.
«Qostanaı oblysynyń turǵyndaryna arnaıy maskasyz dalaǵa shyǵýǵa jáne qoǵamdyq oryndarǵa barýǵa tyıym salynady. Keshki saǵat 22.00-den bastap tańǵy saǵat 06.00-ge deıin shyǵý shekteldi. Tek qajettilikter týyndaǵanda shyǵý usynyldy. Qostanaı oblysynyń aýmaǵynda qoǵamdyq kóliktiń barlyq túrlerimen júretin jolaýshylar maska taǵýǵa mindetti. Taksıde artqy oryndyqta 2 jolaýshydan artyq otyrǵyzýǵa bolmaıdy», - dedi Marat Júndibaev.
