Qostanaı oblysynda qandaı dárigerlerdiń jalaqysy ósedi
Partııalyq baǵdarlamanyń basty mindetterdiń biri - densaýlyq saqtaý salasyn damytý men dárigerlerdiń ál-aýqatyn arttyrý. Aıta keteıik, Memleket basshysy qoǵamdyq densaýlyq pen alǵashqy medıtsınaq kómekke bólinetin qarajattyń jalpy densaýlyq saqtaý salasyna qarastyrylǵan aqshanyń 40 paıyzynan 60 paıyzǵa deıin arttyrylýy tıistigin aıtty. Sonymen qatar atalǵan salany damytýǵa qosymsha 120 mlrd teńge bólinetindigin atap ótti.
Saıası keńes otyrysynda sóz alǵan Densaýlyq saqtaý basqarmasynyń basshysy Vıacheslav Dýdnık bıyl shilde aıynan bastap óńirde 1150 dárigerdiń eńbekaqysy 30%-ǵa ósetinin jetkizdi.
«Negizinen, terapevt, pedıatr, akýsher-gınekolog, neonatolog, onkolog, ftızıatr, gematolog, psıhıatr mamandardyń eńbekaqysy eselenedi. Óńirde dárigerler jalaqysyn kóterýge 240 mln teńge qarastyrylǵan. Sonymen qatar, buǵan deıin tómen jalaqy alyp kelgen 15 myńdaı medbıke men sanıtarlyq qyzmetkerdiń aılyq eńbekaqysy 30%-ǵa ósedi», - deıdi basqarma basshysy.
Sonymen qatar, oblys emhanalaryn qarjylandyrý da eki ese artpaq. Buǵan deıin emhanalarǵa jyl saıyn 12,7 mlrd teńge bólinip kelse, 2022 jylǵa deıin bul kórsetkish 25 mlrd teńgege jetpek. Bul emhanalardaǵy medıtsınalyq kómek sapasyn jaqsartýǵa múmkindik beredi. Densaýlyq saqtaý salasyndaǵy taǵy bir jaǵymdy jańalyq - bıyldan bastap turǵyndardy dári-dármekpen qamtamasyz etýge jumsalatyn qarjy 3 ese ósedi.
Óńirdiń densaýlyq saqtaý salasynda dáriger-mamandar tapshy.
«Qostanaı oblysynda densaýlyq saqtaý salasy boıynsha 600-ge jýyq dáriger jetpeıdi. Onyń 360-y - asa qajet mamandar sanatyna enedi. Dáriger tapshylyǵyn joıý maqsatynda bıyl óńirge kelýge yntaly dáriger-mamandarǵa jalpy mólsheri 700 mln teńge kótermeaqy men járdemaqy bólingen. Munyń syrtynda kelgen mamandy baspanamen qamtamasyz etý múmkindigi de qarastyrylǵan», - deıdi ol.
Buǵan deıin Qostaeaı oblysynda aýyldyq eldi mekenderdegi halyq turmysynyń sapasyn kóterýge baǵyttalǵan «Aýyl 4.0» jobasy engiziletinin habarlaǵan edik.