Qostanaı oblysynda qandaı dárigerler jetispeıdi
QOSTANAI. QazAqparat - Qostanaı oblysynyń aýyldarynda ámbebap dárigerler jetispeıdi. Bul týraly QazAqparat tilshisine oblystyq densaýlyq saqtaý basqarmasynyń basshysy Erkin Dáýitbaev aıtty.
Vedomstvo basshysy aıtqandaı, oblystaǵy densaýlyq saqtaý salasynda 15 459 adamjumys isteıdi. Onyń nebári 1816-sy ǵana dáriger. Tek 6462 qyzmetkerdiń ortasha medıtsınalyq bilimi bar.
«Byltyr Tobyl-Torǵaı óńirine 105 jas maman jáne 16 tájirıbeli dáriger kelgen. Olardyń 93-i aýyldyq jerlerge jiberildi. Arasynda onkologtar, bala dárigerleri, terapevt jáne hırýrgııa salasynyń mamandary bar. Biraq, bul oblystaǵy kadr máselesin tolyq sheshe almady. Qazirgi ýaqytta óńirge 275 dáriger jetispeıdi. Jergilikti bılik qalada jumys isteýge kelgen jas mamandarǵa 500 myń teńgeden, aýyldyq jerlerge at basyn burǵysy kelgenderge 2,5 mln teńgege deıin kóterme aqy usynady. Onyń syrtynda, olar eńbekaqysyna qosymsha yntalandyrý múmkindikterine ıe bolady. Alaıda, osyndaı múmkindikterge qaramastan, medıtsına kadrlarynyń jetispeýshiligi áli seziledi. Qalalar salalyq mamandar qataryn tolyqtyra almaı otyrsa, aýyldarǵa birinshi kezekte terapevtter jáne ámbebap dárigerler qajet», - deıdi E.Dáýitbaev.
Basqarmasynyń basshysynyń aıtýynsha, dáriger tapshylyǵyn joıý úshin júıeli jumystar júrgizilýde. Mysaly, jas mamandardy tartý maqsatynda Batys Qazaqstannyń medıtsınalyq ýnıversıtetimen kelisim jasalǵan. Buǵan qosa memlekettik-jekeshelik áriptestik aıasynda Rýdnyı jáne Zatobol kentinde 250 orynǵa shaqtalǵan emhana salý josparlanǵan.
«Biz jergilikti bıýdjet esebinen 100 dárigerdi salalyq mamandyqtar boıynsha oqyta alamyz. Munan soń olar Qostanaı aımaqtarynda bes jyl jumys isteıdi. Biz qazir rezıdentterge 80 grant bólemiz jáne dáriger mamandyǵyn tańdaǵan jastarǵa taǵy 20 grant úlestiriledi. Olardyń ýnıversıtettegi oqýlarynyń aqysyn tóleımiz. Ásirese, gınekolog, pedıatr, anestezıolog-reanımatolog, kardıolog mamandarǵa suranys joǵary», - dedi basqarma basshysy.
Dáýitbaevtyń sózine qaraǵanda, kadr tapshylyǵynyń kesirinen týberkýlez, ana men bala ólimi, qan aınalý júıesi, qaterli isik aýrýlary boıynsha Qostanaı oblysy táýir kórsetkishke qol jetkize almaı keledi.
