Qostanaı oblysynda kámeletke tolmaǵandar qylmysy órship tur
QOSTANAI. QazAqparat - Qostanaı oblysynda 2017 jyly ıývenaldyq sot kámeletke tolmaǵandarǵa qatysty 36%-ǵa kóp qylmystyq is qaraǵan. Ásirese urlyq jasaý faktileri kúrt artqan, dep habarlaıdy «QazAqparat» HAA tilshisi Qostanaı oblysy kámeletke tolmaǵandar isteri jónindegi mamandandyrylǵan aýdanaralyq sotynyń tóraǵasy Qarlyǵash Sharmuhametovaǵa silteme jasap.
Jyl qorytyndylaryna oraı, kámeletke tolmaǵandarǵa qatysty 91 qylmystyq is qaralǵan, al 2016 jyly bul kórsetkish 59 edi.
«2017 jyly urlyq-qaraqshylyq faktileri kóbeıip otyr. Jasalǵan qylmystardyń 17-si qaraqshylyq, 14-i urlyq faktisi retinde tirkeldi. Bir aıta keterligi, jasóspirimder qylmysty adamdardyń kóz aldynda, ortalyq kóshelerde jasaýdy ádetke aınaldyrǵan», - deıdi Sharmuhametova.
Máselen, qylmystardyń biri Qostanaı qalasyndaǵy Chehov kóshesinde, polıtsııa beketine jaqyn jerde bolǵan. Kámeletke tolmaǵandar jónindegi sot tóraǵasynyń aıtýynsha, tonaý jasóspirimder arasynda «modaǵa» / úrdiske aınalǵan. Olar adamdarǵa tobimen tónip kelip, telefonyn tartyp alyp júr.
«Jasóspirimder qylmysy ásirese jaz aılarynda beleń alady. Jańa jylǵa deıin demalys kezinde jasóspirimder nemen aınalysqanyn baqyladyq. Ol jaıly aqparatty ІІD-ne jiberdik», - dedi ol.
