Qostanaı oblysynda «Kamazǵa» soǵylǵan mınıvendegi eki adam kóz jumdy
QOSTANAI.QazAqparat – Qostanaı oblysynda kisi ólimimen aıaqtalǵan jol-kólik oqıǵasyna qatysty sotqa deıingi tergeý bastaldy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetine súıensek, qaıǵyly oqıǵa 4 mamyr kúni bolǵan. «Honda» jeńil kóliigi Qostanaı oblysy arqyly Aqtóbe qalasyna jol tartqan. Kólikti 29 jastaǵy Atyraý turǵyny basqarǵan.
«Qostanaı-Qarabutaq» tasjolynyń 334 shaqyrymynda júrgizýshi rólge ıe bola almaı, joldaǵy «Kamaz» júk kóligimen soqtyǵysqan.
Jol apaty saldarynan «Hondanyń» júrgizýshisi men jolaýshysy kóz jumdy.
Mınıvende bolǵan 29 jastaǵy taǵy bir jolaýshy aýdandyq aýrýhanaǵa jatqyzyldy. Sonymen qatar jol jóndeý jumysynda júrgen eki qyzmetker zardap shekti. Olar da aýrýhanada jatyr. «Kamaz» júrgizýshisi jaraqat alǵan joq»,- delingen polıtsııanyń aqparatynda.
Polıtsııa departamenti azamattardan jolda saq bolýdy jáne jol qozǵalysy erejelerin buzbaýdy eskertedi.
