Qostanaı oblysynda iri-qara maldyń jaı-kúıi «onlaın» rejımde baqylanbaq
QOSTANAI. QazAqparat - Qostanaıda Tsıfrlandyrýdyń Jol Kartasy aıasynda aýyl sharýashylyǵy salasyna «aqyldy» júıeler engiziledi, dep habarlaıdy QazAqparat oblystyq aýyl sharýashylyǵy basqarmasynyń basshysy Darhan Ábdikárimovke silteme jasap.
Qostanaı oblysynda «aqyldy» júıeler sút jáne et fermalarynda, qus fırmalary, kondıterlik fabrıkalarda qoldanylady. Búginde «Sadchıkovskoe» JShS «Aqyldy sút fermasy» jobasyn qolǵa aldy. Sharýashylyq gollandııalyq golshtıno-frız tuqymdy 1700 iri-qara malyn satyp aldy. Seriktestikte «Evro Klass 1200» dep atalatyn saýyn kesheni bar. Munda bir ýaqytta 32 sıyrdy saýýǵa bolady. Barlyǵy avtomatty túrde júzege asady. Saýyn kesheninen alynǵan sút arnaıy saqtaý ornyna jetkiziledi. Saýynshynyń mindeti - saýý qurylǵysyn jelinge salyp turý. Árbir sıyrdan alynǵan súttiń mólsheri sandyq tabloda kórinedi.
«Bul sharýashylyq tolyqtaı tsıfrlandyrý júıesimen qamtamasyz etiledi. Aldaǵy ýaqytta «Smakstek» qurylǵysy satyp alynady. Bul arqyly árbir ІQM jaı-kúıin «onlaın» rejımde baqylaýǵa múmkindik beredi. Arnaıy dabyl belgisi arqyly janýardyń temperatýrasy, qozǵalys belsendiligi týraly málimet túsip otyrady», - dep túsindirdi Darhan Ábdikárimov.
«Smakstek» qurylǵysy aldaǵy 3 aıda 30-40 analyq ІQM engiziledi. Eger ońdy nátıjege qol jetip jatsa, qurylǵyny 1000 analyq basqa qondyrý josparda bar.
«Qurylǵyny engizý úshin 132 myń evro jumsalady. Osy tsıfrlandyrý júıesin paıdalaný arqyly óndiris kólemi 15%-ǵa ulǵaıady. Sút ónimderi sapasyn arttyrý jáne jem-shóp qorynyń shyǵynyn azaıtýǵa qol jetkizemiz», - dedi basqarma basshysy.
Aıta keteıik, tsıfrlandyrýdaǵy taǵy bir jańashyldyq «Terra» sharýa qojalyǵyna usynyldy. Atalǵan qojalyq ózderiniń aýylsharýashylyq tehnıkalaryna «Monıtorıng plıýs» uıymynyń usynǵan GPS qondyrǵylaryn ornatpaq.
