Qostanaı oblysynda iri qara mal qarasan bolyp, bir aýyl karantınge jabyldy

QOSTANAI. QazAqparat – Qostanaı oblysy ákimdiginiń veterınarııa basqarmasy óńirdegi aýyldardyń birinde sibir jarasy órship turǵanyn rastady. Atalǵan aýyldaǵy jaǵdaı týraly QazAqparat tilshisine quzyrly vedomstvo basshysy Aqat Shyqtybaev aıtyp berdi.

A. Shyqtybaevtyń aıtýynsha, 30 maýsymda Denısov aýdany Sverdlov aýyldyq okrýginiń Prırechnoe aýylyndaǵy «Altaı» JShS-ǵa tıesili iri qara maldyń materıaldaryna PTR ádisimen jasalǵan dıagnostıkalyq zertteý qarasannyń qozdyrǵyshyn anyqtady.

«Aýdannyń veterınarlyq stantsııasy veterınarııa basqarmasynyń basshylyǵymen jáne baqylaýymen ınfektsııa oshaǵynan aýrýdy taratpaý boıynsha sharalardy ýaqytyly qabyldady. Mamandandyrylǵan ınsıneratorda qyrylǵan mal óleksesi órteldi. Sondaı-aq olar ustalǵan jáne ólgen jerlerdi dezınfektsııalaý jumysy júrgizildi. «Respýblıkalyq epızootııaǵa qarsy jasaqtyń» Qostanaı fılıaly 3 shildeden bastap ınfektsııa oshaǵynda barlyq joıý sharalaryn oblystyq jáne aýdandyq veterınarııalyq ınspektsııanyń baqylaýymen júrgizýde», - dep túsindirdi A.Shyqtybaev.

Búgingi kúni indet faktileri tirkelgen barlyq 4 mal sharýashylyǵy bazasynda jáne olardyń irgeles aýmaqtarynda úı-jaı aralyǵyn, astaýlaryn jáne qabyrǵalaryn mehanıkalyq tazartý, ákteý jumystary aıaqtaldy.

«Respýblıkalyq epızootııaǵa qarsy otrıadtyń kúshimen mal bazalaryna, jaıylym alańdaryna, sondaı-aq janýarlar qyrylǵan jerlerge eki ret dezınfektsııa júrgizildi. Barlyq joıý sharalary tolyq kólemde júrgizildi. Denısov aýdanynyń qalǵan aýyldaryndaǵy jáne jalpy Qostanaı oblysy boıynsha epızootııalyq jaǵdaı turaqty», - dep atap ótti Azat Shektibaev.