Qostanaı oblysynda ınternet-alaıaqtar áreketi jıilep ketken

QOSTANAI. QazAqparat - Qostanaı oblysynda ınternet-alaıaqtyq áreketteri jıilep barady. Qostanaı oblystyq Іshki ister departamenti baspasóz qyzmetiniń aqparaty boıynsha, jyl basynan beri ınternet-alaıaqtyqtyń 66 faktisi tirkeldi. Bul týraly Qostanaı oblystyq ІІD baspasóz qyzmetiniń brıfınginde ІІD KPB aǵa jedel ýákili Aıdar Mýsın málim etti, dep habarlaıdy QazAqparat.

Internet-alaıaqtar avtomobıl men onyń bólshekterin satatyn tanymal saıttarda habarlama jarııalaıdy. Mysaly, OLX, Kolesa.

«Alaıaqtar eń tómengi baǵa berip, tegin jetkizemiz degen jeleýmen arbaıdy. Satyp alýshylar ınternet arqyly baılanysqa shyǵyp, úshinshi tulǵalardyń atyna rásimdelgen bank shottaryna jáne ınternet-ámııandaryna aqsha aýdarady. Qazirgi tańda 39 oqıǵaǵa qatysy bar kúdikti anyqtaldy. Ol jumyssyz jergilikti turǵyn bolyp shyqty», - dep habarlady vedomstvodan.

3 sáýirde Qostanaı polıtseıleri jalpy zalaly mıllıon teńgeni quraıtyn úsh alaıaqtyq isti tirkedi.

«Zardap shegýshi jeke kóligin satý týraly habarlama jarııalaǵan. Oǵan belgisiz bireý habarlasyp, kólikti satyp alýǵa daıyn ekendigin jáne onyń bank kartasyna kepilaqy aýdaratynyn aıtqan. Zardap shegýshi bul shartqa kelisip, jeke derekteri men karta nómirin jibergen. Sol kúni onyń shotynan iri somadaǵy aqsha sheship alynǵan», - dep túsindirdi polıtseıler.

Osyǵan baılanysty, polıtseıler azamattardan ózderiniń jeke derekteri men shot nómirlerin beıtanys adamdarǵa habarlamaýyn suraıdy.