Qostanaı oblysynda ınfektsııalyq aýrýhana salynyp jatyr
QOSTANAI.QazAqparat – Bıyl qazan aıynda Qostanaı qalasynda 200 oryndyq ınfektsııalyq aýrýhana paıdalanýǵa beriledi. Bul týraly máslıhat depýtattaryna esep berý kezdesýinde oblys ákimi Arhımed Muhambetov aıtty, dep habarlaıdy QazAqparat.
«Osy jyldyń 1 qazanyna deıin Qostanaı qalasynda tez turǵyzylatyn tehnologııalar boıynsha 200 tósektik juqpaly aýrýlar aýrýhanasyn paıdalanýǵa berý josparlanýda. Qazir Oral kóshesiniń boıynda qurylys júrip jatyr. Aldaǵy eki aıdyń ishinde qurylys tolyq aıaqtalady. Jańa aýrýhanany dáriger mamandarmen qamtý máselesi de rettelip qoıǵan. Bıyl oblysqa ózge óńirlerden 240 dáriger keledi. Aımaqqa jas mamandardy kóptep tartý maqsatynda olarǵa beriletin kóterme aqy kólemi de ósken. Buǵan deıin 1,5 mln teńge kólemindegi kóterme aqy tek aýylǵa baratyn dárigerlerge ǵana berilip kelse, bıyldan bastap qalalyq mekenderdegi medıtsınalyq mekemelerge jumys isteýge kelgen mamandarǵa da 1 mln teńgeden qoldaý kórsetiledi», – dedi aımaq basshysy.
Arhımed Muhambetov jıyn barysynda koronavırýs ınfektsııasymen kúres týraly baıandady. Oblysta indetke qarsy is-qımyl aıasynda 1968 ınfektsııalyq jáne provızorlyq tósek-oryn qurylǵan. Buǵan qosa, eki aılyq dárilik zattar qory jasaldy. Qazirgi ýaqytta medıtsınalyq uıymdarda ókpeni jasandy jeldetý apparatynyń 247 danasy, onyń ishinde aǵymdaǵy jyly satyp alynǵan 58 apparat bar. Taǵy 85 qurylǵyny satyp alý josparǵa alynǵan.
«Jyl basynan beri medıtsınalyq qural-jabdyqtar satyp alýǵa 5 mlrd teńge bólindi. Aýdan-qalalardyń emhanalaryndaǵy tehnıkalyq bazany nyǵaıtý jumystary jalǵasýda. Osy ýaqytqa deıin 80 sanıtarııalyq kólik satyp alyndy. Taıaýda taǵy 30 birlik tehnıka satyp alý josparlanyp otyr. Jaqyn arada jas mamandarǵa 20 páter beriledi», - dedi Arhımed Muhambetov.
Buǵan deıin óńir basshysynyń oblystyq máslıhat depýtattaryna esep bergenin habarlaǵan bolatynbyz,
