Qostanaı oblysynda gaz óńdeý zaýyty salynbaq
Bul týraly «Global Gas Group» JShS dırektory Oleg Goncharov málim etti, dep habarlaıdy QazAqparat.
Qostanaı oblysyna jumys saparymen barǵan Memleket basshysy Nursultan Nazarbaev sheteldik ınvestorlarmen kezdesý ótkizgenin habarlaǵan bolatynbyz . Jıynda atalǵan kásiporyn dırektory Oleg Goncharov Astana men Qazaqstannyń soltústik oblystaryn gazdandyrý máseleleri týraly aıtty.
«Bizdiń kompanııa birneshe jyldan beri gazben qamtamasyz etý jumystarymen aınalysady. 2016 jyly «Gazpromeksport» kompanııasymen kelisimshartqa otyrdyq. Bul bizge jumysty ilgeriletýge múmkindik berdi. Jospar boıynsha 2021 jyldan bastap jylyna 620 mln kýb gaz óńdeımiz. Qostanaı oblysy ákimdigimen kelisimge saı, qýattylyǵy jylyna 200 myń tonna bolatyn gaz óńdeý zaýytyn salamyz»,-dedi kásiporyn basshysy.
Onyń sózinshe, Astana qalasy men soltústik óńirlerdi gazben qamtamasyz etý memlekettik-jekeshelik áriptestik aıasynda júzege asyrylady.
Óńir basshysy Arhımed Muhambetov habarlaǵandaı, qyrkúıek aıynda ótken ınvestıtsııalyq forýmda Qostanaı oblysy men «Global Gas Group» JShS arasynda 20 mlrd teńgeni quraıtyn ınvestıtsııalyq kelisimge qol qoıylǵan.
