Qostanaı oblysynda fermerler 1,3 mlrd teńgeni ıgermegen

QOSTANAI. QazAqparat - Oblystyq máslıhattyń kezekten tys sessııasynda ekonomıka jáne bıýdjettik josparlaý basqarmasynyń basshysy Erlan Spanovtyń baıandamasy tyńdaldy, dep habarlaıdy QazAqparat tilshisi.

Erlan Spanovtyń aıtýynsha, aýyl  sharýashylyǵy basqarmasy maıly daqyldardy sýbsıdııalaý úshin bólingen 1 mlrd 582 mln teńge qarajatty paıdalanbaǵan.

«Sharýalar maıly daqyldar baǵasynyń tómendeýi saldarynan ony zaýyttarǵa ótkizbeı otyr. Sol sebepti memleketten sýbsıdııa berilmeıdi. Bul ıgerilmegen qarjy kelesi jylǵy bıýdjetke qaldyq esebinde kóshiriledi», - dep túsindirdi Spanov.

Oblystyq aýyl sharýashylyǵy basqarmasynyń basshysy Darhan Ábdikárimovtiń sózinshe, maıly daqyldar baǵasynyń tómendeýi Reseı naryǵymen tikeleı baılanysty.

«Bıyl kórshi el maıly daqyldardyń rekordtyq kórsetkishine qol jetkizdi. Sondyqtan zyǵyrdyń baǵasy tonnasyna  95 myń teńgeden 80 myń teńgege deıin,  kúnbaǵys 90 myń teńgeden 80 myń teńgege deıin tómendedi. Bizdiń zaýyttar arzan taýarlardy qabyldaýdy jón kóredi, al jergilikti taýar óndirýshiler mundaı baǵaǵa ótkizgisi kelmeıdi», - deıdi basqarma basshysy.

Darhan Ábdikárimovtiń  aıtýyna qaraǵanda, sýbsıdııaǵa bólingen 1 mlrd 585 mln tengeniń bar-joǵy 265 mln teńgesi ıgerildi.