Qostanaı oblysynda Eýrazııalyq tabıǵı resýrstar korporatsııamen memorandýmǵa qol qoıyldy
QOSTANAI. 25 sáýir. QazAqparat /Petr Plahotnıkov/ - Qostanaı oblysynyń ákimi Sergeı Kýlagın men Eýrazııalyq tabıǵı resýrstar korporatsııasynyń (ENRC PLC) bas atqarýshy dırektory Felıks Výlıs 2011 jylǵa arnalǵan áleýmettik jobalardy júzege asyrý jónindegi yntymaqtastyq týraly memorandýmǵa qol qoıdy.
Oblys ákiminiń baspasóz qyzmetinen habarlaǵandaı, korporatsııa Qostanaı oblysyn áleýmettik abattandyrýǵa bıyl 1,3 mıllıard teńge salǵaly otyr. Qol qoıylǵan qujattyń aıasynda birqatar ekonomıkalyq, áleýmettik jáne mádenı jobalar júzege asyrylmaq. Mańyzdy ınfraqurylymdyq jobalardyń qatarynda Rýdnyı qalasynda kóshelerdi asfalttaý, Qashar aýylyndaǵy mektepti jóndeýge demeýshilik kómek kórsetý jobalary bar. Sondaı-aq fýtboldy qoldaýǵa, shaıbaly hokkeıdi damytýǵa, jalpy óńir sportyn damtýǵa 400 mıllıonnan astam teńge qarajat jumsaýdy josparlaýda.
Korporatsııa Qostanaıdaǵy meshittiń jáne Rýdnyıdaǵy shirkeýdiń qurylysyna, dinı ortalyqtarǵa kómektesýge 320 mıllıondaı teńge bólip otyr. Memorandým aıasynda oblystyń mádenıet, óner jáne bilim qaıratkerlerine de qoldaý kórsetý sharalary qarastyrylǵan.
