Qostanaı oblysynda et ónimderi kombınaty iske qosyldy

QOSTANAI. QazAqparat – Qostanaı oblysynyń Qarabalyq aýdanynda et ónimderin shyǵaratyn kombınat iske qosyldy, dep habarlaıdy QazAqparat.

Qarabalyq aýdanynyń ákimi Nurjan Ótegenovtiń sózinshe, bul birinshiden, otandyq ónimderdiń naryqqa shyǵýyn qamtamasyz etse, ekinshiden, aýdan turǵyndaryn jańa jumys oryndaryna ornalastyrýǵa oń jaǵdaı týǵyzdy.

«Búginge deıin bul kombınattyń jumysy 15 jyl boıy turalap qalǵan bolatyn. QR Tuńǵysh Prezıdenti kúni merekesi aıasynda atalmysh kásiporyn qaıta jańǵyrtylyp, órleý kezeńine qadam basyp otyr. Kombınatty qalpyna keltirý jumystaryna 11 mln teńge jeke qarajat jumsaldy. Qazirgi tańda munda 50 adam turaqty jumyspen qamtylyp otyr», - dedi aýdan ákimi.

Búginde munda 50 adam eńbek etkenimen, kombınat barlyǵy 120 adamdy jumyspen qamtýǵa qaýqarly. Nysan keler jyldyń mamyr aıynda tolyq qýatyna kóship, aýdannyń taǵy 70 turǵyny kombınat qyzmetkeri atanady.

Kásiporyn basshysy Gennadıı Krıger aıtqandaı, qaıta qalpyna keltirilgen nysan et ónimderiniń 23 túrin naryqqa shyǵarady. Al shıkizatty jergilikti aýylsharýashylyq taýar óndirýshilerinen alady.

«Kásiporyn ónimderi qazirgi tańda Qostanaı oblysynyń barlyq aýdandarynyń naryǵyna shyǵyp úlgergen. Endigi maqsat – el ekonomıkasyn eseleý úshin óńirde óndirilgen ónimdi eksporttaý. Kóp keshikpeı Reseı Federatsııasynyń Chelıabi jáne Ekaterınbýrg qalalary biz shyǵarǵan azyq-túlik túrlerin tutynatyn bolady», - dedi ol.