Qostanaı oblysynda et kombınaty qurylysy bastaldy
QOSTANAI. QazAqparat – Oblysynyń ákimi Arhımed Muhambetov Qostanaı qalasyndaǵy birqatar kásiporyndardy aralady. Óńir basshysy bul týraly Instagram-daǵy paraqshasynda jazdy, dep habarlaıdy QazAqparat.
Qostanaı qalasynyń soltústik ónerkásiptik aımaǵyndaǵy «BEEF EXPORT GROUP» JShS kompanııasy zamanaýı et kombınaty kesheniniń qurylysyn bastady. Kásiporyn jylyna 110 myń bas iri qara maly jáne 132 myń bas usaq maldyń etin óndeýge qaýqarly.
«Bul joba «Qarapaıym zattar ekonomıkasy» baǵdarlamasy aıasynda jeke jáne tartylǵan qarajat esebinen júzege asyrylady. Jobanyń jalpy quny – 5,3 mlrd teńge. Múddeli memlekettik organdarǵa osy jobany iske asyrýda barynsha qoldaý kórsetip, bıznesti memlekettik qoldaý sharalary negizinde jetispeıtin óndiristik ınfraqurylymdy júrgizý múmkindigin qarastyrýdy tapsyrdym», - dep jazdy oblys basshysy Sondaı-aq, Arhımed Muhambetov «Qarasý et» JShS et óńdeý kesheniniń óndirisimen tanysty. Kásiporyn etti qaıta óńdeýmen jáne shujyq ónimderin daıyndaýmen aınalysady. Kásiporynnyń jobalyq qýaty – jylyna 5000 tonna et. Arhımed Muhambetov oblystaǵy et eksporty kólemin 6 myń tonnaǵa jetkizý kerektigine toqtaldy. Bul turǵyda óńirdegi taýar óndirýshilerdiń qarqyny kóńil qýantady. Aıta ketý kerek, 2015 jyly Qostanaı oblysy shet elderge nebári 190 tonna et jóneltken.
