Qostanaı oblysynda elektrovoz relsten shyǵyp ketti
QOSTANAI. QazAqparat - 27 qazanda Taran aýdanynda júk tıelgen elektrovoz shoıyn joldan shyǵyp ketti, dep habarlaıdy QazAqparat oblystyq tótenshe jaǵdaılar departamenti baspasóz qyzmetine silteme jasap.
«Taran aýdanyndaǵy Tobyl stansasynda №519 elektrovoz relsten shyǵyp ketti. "Qostanaı-Astana" baǵytyna shyqqan elektrovoz quramynda 61 vagon bolǵan", - delingen vedomstvonyń resmı habarlamasynda.
Aldyn ala boljam boıynsha, shoıyn joldaǵy metall zattardyń kedergi keltirýinen elektrovoz taıyp ketken. 27 qazanda túnde jol qalypqa keltirildi.
Oqys oqıǵa barysynda zardap shekkender joq.
