Qostanaı oblysynda «Elektrondy malshy» jobasy engizildi

QOSTANAI. QazAqparat - Qostanaı oblysynyń Naýyrzym aýdanynda «Tsıfrlyq Qazaqstan» memlekettik baǵdarlamasy sheńberinde egistik alqaptarynyń elektrondy kartalary jasaldy. Bul týraly Óńirlik kommýnıkatsııalar qyzmetinde ótken brıfıngte aýdan ákimi Talǵat Kárbozov aıtyp berdi, dep habarlaıdy QazAqparat.

Negizinen, Naýyrzym aýdanynyń agroónerkásiptik keshenin tsıfrlandyrýdyń negizgi ekpini naqty eginshilik elementterin engizýge jáne mal sharýashylyǵyn tsıfrlandyrýǵa baǵyttalǵan. Birinshi kezeń geopozıtsııalyq, vegetatsııalyq, agrohımııalyq, gıdrogeologomelıoratıvtik jáne meteorologııalyq qabattary bar óristerdiń elektrondyq kartalaryn jasaýdy kózdeıdi.

«Qazirde aýdanda 1024 egis alqaby tsıfrlandyryldy. Bizdiń fermerler egin alqabynyń elektrondyq  kartasy arqasynda elektrondyq sandyq qolhattardy belsendi paıdalanady. Elektrondy tsıfrlyq qoltańba (ETsQ) arqyly úıdegi kompıýterinen shyqpastan, astyqty satý múmkindigin paıdalanyp otyr. «QR agroónerkásiptik keshenin damytýdyń 2017 - 2021 jyldarǵa arnalǵan memlekettik baǵdarlamasy» jáne «Tsıfrly Qazaqstan» memlekettik baǵdarlamasyn iske asyrý maqsatynda aýdandyq Jol kartasy ázirlendi. Osy baǵdarlamaǵa sáıkes aýdanda «Elektrondy malshy» jobasy engizildi. Maldarǵa «Spot Trace» spýtnıktik GPS monıtorıngi ornatylyp, onyń júrgen jerin baqylap otyrýǵa bolady», - dedi aýdan ákimi Talǵat Kárbozov.

Buǵan qosymsha aýdanda jaıylymdaǵy jylqylardyń ornyn qashyqtan baqylaý úshin 6 GPS-treker satyp alyndy. Osylaısha, kez kelgen ýaqytta telefon nemese kompıýter arqyly Google kartalarynyń kómegimen tabynnyń qozǵalýyn kórý múmkindigi bar, bul janýarlardyń tolyq qadaǵalanýyn jáne mal urlyǵyn boldyrmaıdy. Sonymen qatar «Odjahverdıev» sharýa qojalyǵy 44 birlik tehnıkaǵa GPS-jabdyq pen baqylaý datchıkterin satyp aldy. Onyń ishinde 38 «KamAZ» avtomokóligi bar. Sondaı-aq, zamanaýı 6 traktor jumys isteıdi. Olar: 5 K-744 jáne 1 Buhlr Versatile traktory.

«Birneshe sharýa qojalyqtar egistiktiń jaı-kúıin anyqtaý, daqyldardyń ósý sapasyn jáne olardyń aýrýlarmen zaqymdaný yqtımaldyǵyn baǵalaý úshin DJI markaly drondarǵa tapsyrys berdi. Drondardyń arqasynda sharýashylyq qajetti aqparatty jınaý jáne óńdeý múmkindigine ıe boldy. Bul sharýashylyq tabysynyń artýyna jáne ónimdiliktiń jaqsarýyna ákeledi. Geologııalyq ustanym júıesi, jerseriktik sýretter men alqaptardy agrohımııalyq zertteý kartalarynyń kómegimen fermerler tyńaıtqyshtardy engizýge, egistikterdi óńdeýge, aýyl sharýashylyǵy daqyldaryn sebý normalaryn jáne egis aınalymy qurylymyn múldem dál jáne qatesiz anyqtaýǵa qol jetti. Nátıjesinde, shyǵyndar azaıady, al egistiktiń qaıtarymy eselep ósip keledi», - dedi aýdan basshysy.