Qostanaı oblysynda «Elektrondy kolledj» jobasy engiziledi

QOSTANAI. QazAqparat - Byltyr Qostanaı oblysynyń memlekettik mekemeleri 3 mıllıonnan astam memlekettik qyzmet kórsetti. Olardyń deni elektrondy formatta iske asyryldy, dep habarlaıdy QazAqparat Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qostanaı oblysy boıynsha departamentiniń baspasóz qyzmetine silteme jasap.

2018 jyly Qostanaı oblysynyń memlekettik mekemeleri 3 mıllıonnan astam memlekettik qyzmet kórsetken. Bul byltyrǵy kórsetkishpen salystyrǵanda 66,3%-ke artyq. Onyń ishinde 2,2 mln memqyzmet elektrondy formatta iske asyryldy.

«Qujattardyń deni elektrondy formatqa kóshirildi. Óńirlerde júrgizilgen aqparattyq-nasıhat jumystarynyń nátıjesinde turǵyndar memlekettik qyzmetterdi elektrondy túrde alyp keldi. Osy jyly 8 memlekettik qyzmetti elektrondyq formatqa kóshirý josparlanǵan. Aıta keterligi, 2018 jyly oblystyń jergilikti atqarýshy organdary memlekettik qyzmet kórsetý merzimin buzý boıynsha 72 faktige jol bergen, bul ótken jyldyń sáıkes kezeńinen 3,5 ese az», - dedi departament basshysynyń orynbasary Ashat Eskendirov.

Ótken jyly «Tsıfrlyq Qazaqstan» memlekettik baǵdarlamasyn júzege asyrý aıasynda jergilikti bıýdjet esebinen bilim berý jáne densaýlyq saqtaý salasynda 6 memlekettik qyzmet avtomattandyryldy. Endi munyń jalǵasy retinde qurylys, sáýlet jáne jer qatynastary salasynda «Elektrondy mektep» jáne «Elektrondy kolledj» aqparattyq júıeleri engiziledi.

Mamandar atap ótkendeı, memlekettik qyzmetterdi avtomattandyrý qyzmet kórsetýdiń sapasy men qoljetimdiligin arttyrýǵa múmkindik beredi. Sondaı-aq sybaılas jemqorlyq táýekelderin boldyrmaıdy.