Qostanaı oblysynda elektr qýatynyń baǵasy qymbattaıdy

QOSTANAI. QazAqparat – Qostanaı oblysynda aqpan aıynan bastap elektr energııasynyń tarıfi kóterilýi múmkin. Óńirlik kommýnıkatsııalar qyzmetinde ótken brıfıngte Tabıǵı monopolııalardy retteý komıteti oblystyq departamenti aqparat taratty, dep habarlaıdy QazAqparat tilshisi.

Mamandardyń sózinshe, tarıf quny janar-jaǵarmaı men elektr qondyrǵylarynyń qymbattaýy saldarynan ósedi. Nátıjesinde «Qostanaı energo ortalyǵy» seriktestigi oblystyq Tabıǵı monopolııalardy retteý jáne básekelestikti qorǵaý departamentine elektr qýatynyń baǵasyn ósirý jóninde tapsyrys bergen.

«2019 jyldyń sońynda «Qostanaı energo ortalyǵy» seriktestiginen jaryq baǵasyn ósirý týraly 155 ótinim kelip tústi. Ortalyq basshylyǵy QR Energetıka mınıstrligine elektr energııasy tarıfin 7,5% kóterý týraly ótinim jazǵan. Monopolıster bul ótinimniń negizinde saraptama júrgizdi. Saraptama nátıjesine sáıkes, elektr energııasynyń tıimdi baǵasy qosylǵan qun salyǵynsyz 7,2 paıyzǵa ósip, 18,92 teńgege deıin tómendetildi. Sonda jeke tulǵalar úshin elektr energııasynyń baǵasy 7 tıynǵa ǵana ósip otyr. Al, zańdy tulǵalar jaryq úshin 23,3 teńge tóleıtin bolady», - deıdi Tabıǵı monopolııalardy retteý komıteti oblystyq departamentiniń basshysy Aqan Tashpanov.

Ótken jyldyń sońynda zańdy tulǵalar úshin elektr energııasynyń baǵasy 23 teńge 81 tıyn bolǵan.