Qostanaı oblysynda ekotýrızm qalaı damytylmaq
QOSTANAI. QazAqparat - Qostanaı oblysyn týrıstik destınatsııa retinde damytý boıynsha is-sharalar jospary ázirlendi. Bul týraly óńir ákimdiginde ótken jıynda Kásipkerlik jáne ındýstrııalyq-ınnovatsııalyq damý basqarmasynyń basshysy Isa Qudabekov málim etti, dep habarlaıdy QazAqparat tilshisi.
«Bizdiń oblysymyz Almaty, Aqmola, Shyǵys Qazaqstan nemese Ońtústik Qazaqstan oblystary sııaqty tabıǵı resýrstarǵa baı bolmasa da, týrızm baǵyttaryn damytýdyń alǵysharttaryn qurdy. Máselen, Naýryzym qoryǵynyń, Qarabalyq qoryqshasynyń, «Altyn dala» rezervaty tabıǵatynyń ár alýandyǵy ekologııalyq týrızmdi damytýǵa múmkindik beredi. Jalpy, óńirde 300-ge jýyq shaǵyn kól men 5 myńnan astam ózen, 103 ań sharýashylyǵy men 128 balyq aýlaýdy paıdalaný aıdyndary tirkelgen», - dedi basqarma basshysy óz baıandamasynda.
Oblysta týrıstik qyzmet kórsetetin 85 sýbekt, onyń ishinde 16 týroperator jáne 69 týragent bar. Alaıda, óńirde ishki týrızmdi damytatyn jalǵyz týroperator jumys isteıdi. Ol - «BESTkz» JShS. Seriktestik Qostanaı oblysy boıynsha 27 týrıstik paket ázirledi. Byltyr atalǵan týrıstik paketti 1 myńǵa jýyq týrıst paıdalandy.
«Qostanaı oblysyndaǵy ishki týrızm túrlerin 2022 jylǵa deıin damytýdyń negizgi jospary daıyndaldy. Sondaı-aq Qostanaı oblysyn týrıstik destınatsııa retinde damytý boıynsha is-sharalar jospary ázirlendi. Nátıjesinde aımaqtaǵy týrıstik klasterlik ýchaskeler anyqtaldy. Onyń ishinde ekologııalyq, mádenı-tanymdyq, emdik-saýyqtyrý, ańshylyq trofeılik oryndar tizimi jasaldy», - dedi I.Qudabekov.
Aǵymdaǵy jyly negizgi jospar sheńberinde 25 is-shara kózdelgen, olardy iske asyrýǵa jergilikti bıýdjetten 43 mln teńgege jýyq qarajat qajet. Belgili bolǵandaı, Meńdiqara aýdanynda «Kamenskýralskoe» demalys bazasyn, Amangeldi, Jankeldın, Qamysty aýdandarynda ań aýlaý úılerin, Qostanaı aýdanynda «Hatıko» týrıstik saýyqtyrý keshenin qurýǵa ınvestorlardy tartý boıynsha bastamalar bar.
