Qostanaı oblysynda eki jataqhana salynyp jatyr
QOSTANAI.QazAqparat – Qostanaı oblysynda stýdentterge arnalǵan eki jataqhananyń qurylysy bastaldy. Bul týraly Arhımed Muhambetov óńirlik kommýnıkatsııalar alańynda ótken brıfıngte aıtty, dep habarlaıdy QazAqparat.
Qostanaı oblysynda jalpy kontıngenti 22 myńnan astam stýdentti qamtıtyn 34 tehnıkalyq jáne kásiptik bilim berý uıymy jańa oqý jylyn qashyqtan bastaıdy. Barlyq kolledjderde tıisti jaǵdaılar jasalǵan.
«Búginde oblysta 25 memlekettik bilim berý basqarmasy, 2 densaýlyq saqtaý basqarmasy jáne 7 jeke menshikke qaraıtyn oqý orny jańa oqý jylyna daıyn. Osy jyly kolledjderge memlekettik tapsyrys boıynsha 5203 stýdentti qabyldaý kútilýde. 0nyń ishinde «Eńbek» memlekettik baǵdarlamasy boıynsha 950 stýdent alynady. Qabyldaý aǵymdaǵy jyldyń 27 tamyzyna deıin jalǵasady», - dep atap ótti aımaq ákimi.
Arhımed Muhambetov aıtqandaı, «Jumyspen qamtýdyń jol kartasy» sheńberinde Qostanaı qalasynda eki jataqhananyń qurylysy bastaldy.
«Jyl sońyna deıin 700 mln teńge somasyna 250 oryndyq Qostanaı joǵary medıtsınalyq kolledji salynady. Osy merzimde 1,5 mlrd teńgege 500 oryndyq Qostanaı avtomobıl kóligi kolledji paıdalanýǵa beriledi. Biraq, qurylys tolyǵymen 2021 jyly aıaqtalady. Negizi qazir oblysta 25 jataqhana jumys isteıdi. 1300 stýdent jataqhanaǵa muqtaj. Bul máseleni birtindep sheshemiz», - deıdi ákim.
