Qostanaı oblysynda eki reseılik 40 keli kúmispen ustaldy
ASTANA. QazAqparat - Qostanaı oblysynda aǵaıyndy eki reseılik 40 keli kúmispen ustaldy, dep habarlady QR UQK Shekara qyzmetiniń baspasóz qyzmetinen.
«Qostanaı shekara jasaǵynyń «Qaıraq avto» baqylaý bólimshesinde 1 qańtarda 38 jáne 45 jastaǵy aǵaıyndy eki Reseı azamaty ustaldy. Olar «Lada Prıora» avtokóligimen Reseıge qaraı bet alǵan. Kólikti tekserý kezinde onyń benzın bagynda bóten zat tabyldy. Aǵaıyndylardyń biri bul 20 kg óńdelmegen kúmis ekendigin moıyndady»,- delingen habarlamada.
Ári qaraı tekserý barysynda avtokóliktiń artqy oryndyqtarynyń astynan taǵy da bir orama tabyldy. Onda salmaǵy 7 kg bolatyn kúmisten jasalǵan ártúrli zergerlik buıymdar boldy.
Keıin polıtsııa qyzmetkerleri shekarashylarmen janar-jaǵar maı bagyn ashty. Odan 20 keli kúmistiń ornyna 33 keli kúmis shyǵaryldy.
Kólikten jalpy alǵanda 40 keli aq tústi metall (kúmis) tabyldy.
Ustalǵan azamattarda zergerlik zattardyń 5 qujaty bar. Bul 64 ataýly 4770 buıymǵa ǵana tıesili. Qaǵazdar men fıskaldy chekter RF Daǵystan Respýblıkasynyń Mahachqala qalasynda berilgen.
Ustalǵandar Qostanaı oblysy Qarabalyq aýdanynyń ІІB-ine tapsyryldy.
