Qostanaı oblysynda egis jumystaryna qosymsha dızel otyny bólindi
QOSTANAI. QazAqparat – Qostanaı oblysynda egis jumystaryn júrgizýge 397 myń tonna dızel otyny bólindi. Bul týraly óńirge jumys saparymen kelgen QR Aýyl sharýashylyǵy vıtse-mınıstri Rústem Qurmanov málim etti, dep habarlaıdy QazAqparat tilshisi.
Jyl basynda oblystaǵy egis jumystaryn júrgizýge Energetıka mınıstrliginiń kelisimi boıynsha 387 myń tonna dızel otyny bólingen-di. Alaıda, aýa raıynyń kúrdeli jaǵdaılaryn eskere otyryp, aýyl sharýashylyǵy mınıstrligi qosymsha 10 myń tonna qarastyrýdy usynǵan.
«Bul barlyq aýdandardyń dızel otynyna degen suranysyn tolyq jabýǵa múmkindik berdi. QR Energetıka mınıstrligi munaı óndirý zaýytynda dızel otynynyń baǵasyn aqpan jáne naýryz aılarynda lıtri 161 teńge dep belgilegenin atap ótý qajet. Bul – 1 tonna úshin 194 myń teńge. Operatorlardy jetkizýdi eskere otyryp, óńirlerde lıtrine ortasha baǵa 177 teńgeni quraıdy. Qazirgi ýaqytta aımaqtarda operatorlarmen shart jasasyp, bólingen otyn kólemi úshin aqy tólenýde», - dedi QR AShM vıtse-mınıstri.
Sonymen qatar, «Agrarlyq nesıe korporatsııasy» AQ AÓK sýbektilerin qoldaý úshin respýblıkalyq bıýdjetten 70 mlrd teńge bıýdjettik nesıe bóldi. Bul burynǵydan 10 mlrd teńgege artyq. Nesıe alýshylar úshin jyldyq syıaqy mólsherlemesi 7%-dan aspaıdy.
Sharýalarǵa nesıe «Agrarlyq nesıe korporatsııasy» AQ ekinshi deńgeıli bankterdiń, kredıttik seriktestikterdiń, óńirlik ınvestıtsııalyq ortalyqtar men mıkroqarjy uıymdarynyń kepildigi arqyly tikeleı beriletin bolady.
