Qostanaı oblysynda egin oraǵy aıaqtaldy
QOSTANAI. QazAqparat – Qostanaı oblysynyń dıqandary qambaǵa 3 mln 967 myń tonna astyq quıdy. Bul týraly oblystyq Aýyl sharýashylyǵy basqarmasy málimet berdi, dep habarlaıdy QazAqparat.
Aımaqtaǵy astyq shyǵymy, orta eseppen, gektaryna 7,6 tsentnerdiń aınalasynda boldy. Eń ozyq kórsetkish – 13,5 tsn/ga Fedorov aýdanyna tıesili. Odan keıingi nátıje Sarykól, Uzynkól, Qarasý, Meńdiqara jáne Qostanaı aýdandarynda. Al óńirdiń ońtústik aýdandaryndaǵy nátıje kóńil qýantarlyqtaı emes.
«Bıdaı jınaý aıaqtaldy. Bıylǵy kórsetkish byltyrǵa qaraǵanda eki mıllıon tonnaǵa kem. Qambaǵa quıylǵan bıdaıdyń 68 protsenti úshinshi sanatqa jatqyzylady. «Azyq-túlik kelisimsharty korporatsııasy» AQ úshinshi sanatty bıdaıdyń baǵalaryn jarııalady. Qazir bul baǵa 70-76 myńnyń aınalasynda. Deı turǵanmen, aýyl sharýashylyǵy taýar óndirýshileri astyǵyn satýǵa asyǵar emes. Óıtkeni, aldaǵy ýaqytta baǵa kóterilýi múmkin. Astyq naryǵynda baǵa turaqsyzdyǵy baıqalady. Baǵanyń qalyptasý kezeńin dóp basyp aıtý qıyn», - deıdi oblystyq aýyl sharýashylyǵy basqarmasynyń bas mamany Nursultan Qabdelov.
Qazirgi tańda maıly daqyldardy terý jumystary jalǵasýda. Zyǵyr, raps egilgen 510 myń gektar aýmaqtyń 347-sine oraq túsken. Ortasha shyǵym – gektaryna 4,8 ga. Bul da byltyrǵy kórsetkishten áldeqaıda tómen. Jazǵy aptap ystyqtan oblystaǵy 74 myń gektar alqap kúıip ketken. Sonyń nátıjesinde, júzdegen sharýa saqtandyrý tólemaqysyna qol jetkizdi.
Aıta keteıik, bıylǵy oraq naýqanynyń tolyq nátıjesi qarasha aıynyń bas kezinde ótetin dástúrli agrojıynda qorytyndylanady.
