Qostanaı oblysynda «Dombyra» kompozıtsııasy ornatyldy

QOSTANAI. QazAqparat – Qostanaı oblysynyń Arqalyq qalasynda «Dombyra» kompozıtsııasynyń ashylý rásimi ótti, dep habarlaıdy QazAqparat.

Bul joba «Rýhanı qazyna» baǵdarlamasyn iske asyrý sheńberinde qolǵa alyndy. Músinniń bıiktigi – 3 metr, tuǵyry – 70 sm. Qańqasy temirden jasalyp, syrty sıntetıkalyq materıalmen qaptalǵan. Quny 950 myń teńge bolatyn músinniń avtory Amangeldi aýdanynyń jas kásipkeri Jasulan Nurbaev. Músinniń lentasyn qııý qurmeti mádenıet qaıratkerleri Shóptibaı Baıdildın men Borash Ábenovke berildi.

«Dombyra qazaqtyń ulttyq aspaby ǵana emes, halqynyń murasy. Qazaq qashanda dombyrany qadir tutyp, tórine ilip, joǵary baǵalaǵan. Kıeli aspaptyń qurmetine byltyr Elbasynyń jarlyǵymen Ulttyq dombyra kúni bekitildi. Qazaqtyń kıiz úıi, qara dombyrasy jáne aıtys óneri álem elderiniń eń ejelgi muralary retinde «ıÝNESKO» tizimine engen. Arqalyq qalasynda ulttyq aspapqa qurmet kórsetilip, músinin ashyp jatyr. Bul iske bastamashy bolǵan jastarǵa alǵysym sheksiz. Rýhanı jańǵyrýdy naqty ispen kórsetip júrgen osy jastarymyz aman bolsyn», - deıdi ólketanýshy Shóptibaı Baıdildın.
Rasymen de, dombyra músininiń ornatylýyna «Jasampaz jastar uıymy» qoǵamdyq birlestigi muryndyq boldy. Birlestik tóraıymy Gúlhashıma Orazovanyń aıtýynsha, Arqalyqta osyndaı rýhanı sharalar áli de jalǵasyn tabady.