Qostanaı oblysynda dıspanserler men aýrýhanalardy biriktirmek
QOSTANAI. QazAqparat - Qostanaı oblysynda dıspanserler men aýrýhanalardy biriktirý josparlanyp otyr. Qandaı medıtsınalyq mekemeler biriktiriletini týraly óńirlik kommýnıkatsııalar qyzmetinde ótken brıfıngte oblystyq densaýlyq saqtaý basqarmasy basshysynyń orynbasary Ekaterına Slobodenıýk aıtyp berdi, dep habarlaıdy QazAqparat.
«Aýrýhanalar men dıspanserlerdi qosýdy, Densaýlyq saqtaý mınıstrligimen, jergilikti atqarýshy organdarmen uzaq ýaqyt keńesip, josparladyq. Ol naýqasty barlyq baǵyttar boıynsha bilikti kómekpen qamtamasyz etýge jaǵdaı jasaıdy», - deıdi E. Slobodenıýk.
Onyń aıtýynsha, mekemelerdi biriktirý kadrlardy qysqartýǵa alyp keledi.
«Medıtsınalyq mekemelerdegi jumys oryndarynyń barlyǵy saqtalady, tek keıbir ózgerister bolýy múmkin», - dedi ol.
Qazirdiń ózinde psıhıatrııa jáne narkologııa qyzmetterin biriktirý boıynsha jumystar bastalyp ketken.
«Qazir qujattar rettelip jatyr. Mekemeler qosylyp, Qostanaı oblystyq psıhıkalyq densaýlyq ortalyǵyna aınaldyrylady. Keıin oǵan psıhıatrııalyq aýrýhana qosylady, ıaǵnı ol statsıonar bolady. Al ambýlatorlyq qyzmet emhanalarǵa kóshiriledi», - deıdi E. Slobodenıýk.
Sondaı-aq, josparǵa sáıkes oblystyq aýrýhana perınataldyq ortalyqpen birigedi, olarǵa keıinnen oblystyq teri-venerologııalyq dıspanseri, onkologııalyq dıspanser jáne oblystyq oftolmologııalyq aýrýhana qosylady.
Osynyń bári, E. Slobodenıýktiń sózine qaraǵanda, naýqastarǵa kórsetiletin medıtsınalyq qyzmetterdiń sapasyn jaqsartady.
