Qostanaı oblysynda dárilerdi qymbatqa satqan dárihanalarǵa aıyppul salyndy
QOSTANAI.QazAqparat – Qostanaı oblysynda dárilerdi qymbatqa satqan dárihanalarǵa 3 mıllıon teńgeden astam somaǵa aıyppul salyndy, dep habarlaıdy QazAqparat taýarlar men kórsetiletin qyzmetterdiń sapasy men qaýipsizdigin baqylaý departamentiniń baspasóz qyzmetine silteme jasap.
Departament mamandary prokýratýra qyzmetkerlerimen birlesip, oblys dárihanalaryna monıtorıng júrgizýde. Basty maqsat – dári-dármek baǵasynyń ósýine jol bermeý. Búgin oblys ortalyǵyndaǵy 115 dárihana tekserilip, 24 túrli sıpattaǵy zańbuzýshylyq anyqtaldy.
«Oblys ortalyǵynda baǵany belgilengen normadan joǵary kóteretin dárihanalar anyqtaldy. Atap aıtqanda, «Len Farm» JShS «Fıltrým» dárisin 1300 teńgege satqan, osy preparattyń shekti baǵasy – 1036 teńge, «Qojahmetova» jeke kásipkerligi 583 teńge turatyn «Novıgan» dárisin 780 teńgege satqan. Sonymen qatar «Jýsýpova» kásipkerligi de belgilengen erejeni buzdy. «Ingavırın» dárisin 6000 teńgege satqan, alaıda preparattyń shekti baǵasy – 5640 teńge. Osyndaı zańbuzýshylyqtar Arqalyq, Rýdnyı, Denısov, Uzynkól, B. Maılın, Áýlıekól aýdandarynyń dárihanalarynda anyqtaldy», - deıdi departament dırektorynyń orynbasary Saýle Erjanova.
Qazirgi ýaqytta óndiriske ákimshilik quqyq buzýshylyq týraly 24 materıal túsken. Olardyń 20-sy qaralyp, dárihanalarǵa aıyppul salyndy. Búgingi jaǵdaı boıynsha aıyppul somasy 3201645 teńgeni quraıdy. Reıdtik is-sharalar jalǵasýda.
