Qostanaı oblysynda dári-dármektiń 2 aılyq qory bar
QOSTANAI. QazAqparat – Búgin Qostanaı oblysynyń ákimi Arhımed Muhambetov koronavırýstyq ınfektsııanyń taralýyna jol bermeý jónindegi jedel shtab otyrysyn ótkizdi, dep habarlaıdy QazAqparat oblys ákiminiń baspasóz qyzmetine silteme jasap.
Jıyn barysynda koronavırýstyq ınfektsııaǵa baılanysty memlekettik organdar qabyldaıtyn sharalardyń tıimdiligi qaraldy. Búginde óńirdegi medıtsınalyq uıymdarda COVID-19 emdeý hattamasymen usynylatyn dári-dármekterdiń 2 aılyq qory bar. Sondaı-aq, jeke qorǵaný quraldarymen qamtamasyz etý jaǵdaıy turaqtandy, ol da 2 aıǵa jetkilikti.
Oblystyq densaýlyq saqtaý basqarmasynyń málimetinshe, ınfektsııamen jumys isteýge tartylǵan medıtsınalyq uıymdar ottegi qurylǵysymen tolyq qamtamasyz etiledi. Jaqyn arada AQSh, Túrkııa, Qytaı jáne Reseı óndirisiniń 400-den astam ottegi kontsentratyn jetkizý josparlanǵan. Olar oblystyń 4 aýrýhanasyna (oblystyq aýrýhana, Qostanaı jáne Rýdnyı qalalyq aýrýhanalary, Tobyl qalasynyń týberkýlezge qarsy dıspanseri) ortalyqtandyrylǵan júıe arqyly úlestirilip beriledi. Búgin ottegi kontsentratorlarynyń birinshi partııasy kelip tústi.
«Karantındik sharalar saqtalmaǵan jaǵdaıda barlyq qabyldanatyn sharalar tıimsiz bolyp otyr. Muny ártúrli salalardan baıqap otyrmyz. Monıtorıng toptary profılaktıkalyq, epıdemııaǵa qarsy jáne karantındik is-sharalardy saqtaý boıynsha ár túrli menshik nysanyndaǵy 1210 nysandy tekserdi. Onyń ishinde 22 obektide (2%) sanıtarlyq-dezınfektsııalyq rejımdi buzý anyqtaldy, 22 demalys ornyna aıyppul salyndy. Memlekettik organdardyń basshylary KVI-men kúres boıynsha tıimdi sharalar qabyldaýy kerek. Jaǵdaıdy erekshe baqylaýda ustaýdy tapsyramyn», - dedi Arhımed Muhambetov.
Oblysta jedel járdem stantsııasy kúsheıtilgen rejımde jumys isteıdi.
Sondaı-aq, halyqtyń shaqyrýlary táýligine ortasha eseppen 5%-ǵa tómendegen.
