Qostanaı oblysynda daǵdarysqa qarsy sharalardy iske asyrý bastaldy
Qostanaı oblysy ákimdiginiń jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnar Ábenovanyń aıtýynsha, bıyl Jumyspen qamtýdyń jol kartasy sheńberinde 99 joba josparǵa qoıylǵan.
«Jalpy Jumyspen qamtýdyń jol kartasy aıasynda 275 aýqymdy jobany oryndaý kózdelgen. Onyń ishinde áleýmettik-mádenı, turǵyn úı-kommýnaldyq sharýashylyq, ınjenerlik-kóliktik ınfraqurylym, eldi mekenderdi abattandyrý salalaryna ekpin túsirildi. Qazir 210 jobanyń kelisimsharty daıyn. Jumys oryndaryn qurý monıtorıngi «Jumys oryndaryn qurýdyń ıntegratsııalanǵan kartasy» aqparattyq júıesi arqyly júzege asyrylatyn bolady. Baǵdarlama aıasynda 13,5 myń jumys ornyn ashý josparlanýda. Qazirgi ýaqytta jumyssyzdar retinde esepte 4 myń adam tur», - dedi Gúlnar Ábenova.
Gúlnar Ábenova jumysqa úmitkerlerdi irikteý kezinde kolledj túlekterine nazar aýdarýdy usyndy. Osy jyly tehnıkalyq jáne kásiptik bilim berý uıymdaryn 7 myńǵa jýyq stýdent aıaqtaıdy.
«Olardyń birden jumys taýyp ketpeıtini anyq. Osy rette Jumyspen qamtýdyń jol kartasy kómekke keledi», - dep túıdi basqarma basshysy.
