Qostanaı oblysynda tsıfrlandyrýǵa baılanysty jańa basqarma qurylady

QOSTANAI. QazAqparat - Jaqynda Qostanaı oblysynda Tsıfrlandyrý jónindegi basqarma óz jumysyn bastaıdy. Bul týraly «Tsıfrlyq Qazaqstan» baǵdarlamasyna arnalǵan jıynda oblys ákimi Arhımed Muhambetov málim etti, dep habarlaıdy QazAqparat tilshisi.

Arhımed Muhambetov atap ótkendeı, Elbasy óz Joldaýynda on naqty mindetti ataı otyryp, ónerkásip, kólik, bilim berý jáne basqa da salalarǵa búgingi zamannyń ozyq tehnologııasyn engizýge erekshe mindet júktedi.

 

«Sol sebepti, biz osy baǵytta jumys isteýimiz kerek. Jaqyn arada tsıfrlandyrý jónindegi basqarma qurylady. Jańa basqarmanyń naqty mindetteri anyqtalyp, 4 aı ishinde jumys jospary bekitilmek. Sondaı-aq, qala-aýdandardyń ákimderi tsıfrlandyrýǵa baılanysty aı saıyn esep jiberip otyrady», - dedi oblys ákimi.

Jıyn barysynda belgili bolǵany, tsıfrlandyrýǵa baılanysty óńirde jyl aıaǵyna deıin 100-den astam joba iske qosylýy tıis. Qazirdiń ózinde 68 joba óńir basshysymen kelisilip, óz jumysyn bastap ketti.

 

Al oblys ákiminiń orynbasary Meıirjan Myrzalıev óz baıandamasynda tsıfrlandyrýdyń 12 baǵytyn qamtıtyn qujatty iske asyrýda sheteldik tájirıbeler de qoldanylatynyn aıtty.

«Qostanaı oblysynda 20 aýyl sharýashylyǵy kásiporny agrarlyq-ónerkásiptik keshenderdi (AÓK) tsıfrlandyrý jobasyna qatysý úshin iriktelip alyndy. Jalpy, búginde óńirdegi 700 kásiporynǵa tsıfrlandyrý elementteri engizilgen. Atap aıtqanda, egin alqabynyń jaǵdaıyn baqylaıtyn jerseriktik monıtorıng, avtokólik pen aýyl sharýashylyǵy tehnıkasyn baqylaý, janarmaı deńgeıin kórsetetin qurylǵy, agrobaǵyttaýshylar, mal sharýashylyǵynda maldy chıpteý sııaqty júıeler shetelderde jaqsy damyǵan. Máselen, Kanadada mal jaǵdaıyn baqylaý úshin drondar paıdalanylady», - dep atap ótti Myrzalıev.