Qostanaı oblysynda bıýdjettik uıymdar úshin aýyzsý baǵasy qymbattaıdy

QOSTANAI. QazAqparat – 2020 jyldyń 1 qańtarynan bastap sý tarıfi tek bıýdjettik uıymdar úshin ǵana qymbattaıdy. Bul týraly «Qostanaı-Sý» kommýnaldyq kásipornynyń dırektory Erkebulan Faızýllaev aıtyp berdi, dep habarlaıdy QazAqparat.

Kásiporyn dırektorynyń sózinshe, turǵyn úı sektorlary úshin jańa jyldan bastap sýyq sý tarıfi kóterilmeıdi.

«Bizdiń kásiporyn halyqtyń áleýmettik turaqtylyǵyn nyǵaıtý boıynsha birshama jumys atqardy. Bir jaǵynan tutynýshylar bereshegi azaıyp, qarjyny ıgerý kórsetkishi artty. Sonymen qatar kásiporynǵa úkimet tarapynan úlken qoldaý kórsetilip otyr. 2019-2021 jyldarǵa bizge bıýdjetten 10 mlrd teńge qarajat bólindi. Nátıjesinde 60 shaqyrym aýyzsý qubyry jóndeldi. Tabıǵı monopolııalardy retteý komıteti oblystyq departamentiniń buıryǵyna sáıkes, tutynýshylar tizimine kiretin qala turǵyndary, zańdy tulǵalar, kásipkerler men jylý kompanııalary úshin sý baǵasy sol qalpynda qalady», - dedi Erkebulan Faızýllaev.

Jańa jyldan bastap, tarıf tek bıýdjettik uıymdar úshin 33 paıyzǵa kóteriledi. Osy rette atalǵan uıymdardyń sý jáne káriz júıelerin jabdyqtaýǵa baǵyttalǵan birqatar jumystar júrgiziledi.

Aıta keteıik, 2019 jyly jalpy quny 658 mln teńgege qubyrlardy retke keltirý jumysy júrgizildi.