Qostanaı oblysynda buzylyp qalǵan KamAZ-dyń kesirinen orman órti tutandy
QOSTANAI. QazAqparat – Qostanaı oblysynyń Qarabalyq aýdanynda ormanda aǵashtar men shópter jandy, dep habarlaıdy QazAqparat tilshisi.
«Qostanaı oblysy Qarabalyq aýdany, Peschanoe aýylynyń mańyndaǵy Baıqadam orman sharýashylyǵy aýmaǵynda 0,4 ga qurǵaq shóp tutandy. Ot ormanǵa qaraı ótip, 0,6 ga aýmaqty sharpydy», - dep habarlady Qostanaı oblysy Tótenshe jaǵdaılar departamentinen.
11 mamyr kúni keshke bastalǵan órtpen kúres búgin tańǵa deıin sozyldy. Órt aýyzdyqtalyp, kúzetý men baqylaý maqsatynda tehnıka qoıyldy.
«Órttiń tutaný sebebi – buzylǵan KamAZ avtokóligi. Jergilikti sharýa qojalyǵynyń jumysshysy egis alqabyn óńdep júrgen. Mashına jasyl jelek mańaıynda synyp qalǵan. Kólikti jóndeý barysynda ottyń ushqyny qurǵaq shópke túsken», - dedi TJD-dan.
Kólik júrgizýshisine qatysty «Órttiń tutanýyna alyp kelgen ormanda órt qaýipsizdigi erejelerin jáne sanıtarlyq normalardy buzý» baby boıynsha ákimshilik hattama toltyryldy.
