Qostanaı oblysynda boıjetkendi qaǵyp ketken kúdiktige qatysty jańa derekter belgili boldy
ASTANA. QazAqparat - Qostanaı oblysynyń ІІD baspasóz qyzmetiniń habarlaýynsha, atalǵan qylmysqa qatysty qamalǵan kúdiktiniń boıjetkendi óltirmek bolǵany anyqtalyp otyr, dep habarlaıdy «QazAqparat» HAA tilshisi.
Qostanaı oblysynyń ІІD baspasóz qyzmetiniń resmı aqparatyna sáıkes, búgin osy iske qatysty baspasóz máslıhaty ótkizilgen. Onda Qostanaı oblysynyń ІІD tergeý basqarmasynyń bastyǵy Aron Almatov polıtsııa jiti tergeý amaldaryn júrgizip, saraptama jumystaryn qolǵa alǵanyn habarlady. Aron Almatovtyń aıtýynsha, «áý basta keltirilgen jaraqattyń deńgeıi anyqtalmaǵandyqtan, QR QK 107-baby 1-bóligi boıynsha «Densaýlyqqa qasaqana orta dárejede jaraqat keltirý» baby boıynsha qylmystyq is qozǵalǵan. Buǵan qosa qoǵamdyq tártip buzylǵandyqtan, «buzaqylyq» baby boıynsha tergeý júrgizilgen.
«Qazirgi ýaqytta ustalǵan 33 jastaǵy jigittiń áreketi QR QK 24-baby 3-bóligi «qylmysqa oqtalý» men 99-baby 1 bóligine «kisi óltirýge áreket jasaý» qaıta saralandy. Kúdikti ýaqytsha ustaý oshaýlaǵyshqa qamaldy», - dep habarlaıdy quzyrly organnan.
Sonymen birge, beınebaqylaý kameralaryn qaraý barysynda júrgizýshiniń buryn aıtylǵandaı birneshe ret emes, boıjetkendi bir ret qaqqany anyqtalyp otyr.
Eske sala ketsek, 16 shilde kúni Qostanaı oblysynyń Zatobolsk kentinde 33 jastaǵy «Gazel» avtokóliginiń júrgizýshisi 25 jastaǵy boıjetkendi qasaqana qaǵyp ketken. Polıtsııanyń habarlaýynsha, osynyń saldarynan boıjetken ár túrli dárejede dene jaraqatyn alǵan.
