Qostanaı oblysynda bosanǵan áıel dárigerdiń kesirinen kóz jumdy
QOSTANAI. QazAqparat - Bul fakti týraly Qostanaı oblysy ákiminiń qatysýymen ótken densaýlyq saqtaý basqarmasynyń keńeıtilgen kollegııasy barysynda aıtyldy. Qaıǵyly oqıǵa Jangeldi aýdanynda bolǵan, dep habarlaıdy QazAqparat tilshisi.
Qoǵamdyq densaýlyq saqtaý departamentiniń basshysy Oral Bekmaǵambetovtiń aıtýynsha, oqıǵa ortalyq aýdandyq aýrýhanada bolǵan.
«Qazir táýelsiz sarapshylar tartylyp, tekserý júrgizilip jatyr. Bir jarym aptadan keıin tekserý aıaqtalady. Sarapshylar barlyq qujattardy qarap shyqty. Biz qazir olardyń qorytyndysyn kútip otyrmyz. Medıtsına qyzmetkeriniń kinási bar», - dedi O.Bekmaǵambetov.
Ákim bul jaǵdaıǵa beı-jaı qaramaı, istiń mán-jaıyn anyqtaýdy jáne kinálilerdi jazalaýdy tapsyrdy.
«Jyl basynan beri birinshi ret ana ólimi tirkelip tur. Bul fakti boıynsha medıtsına qyzmetkeri jazalanady. Eger onyń kinási dáleldense, jumysynan shyǵaramyz. Tekserýdiń nátıjesin maǵan baıandańyz», - dedi oblys ákimi Arhımed Muhambetov O.Bekmaǵambetovke.
Densaýlyq saqtaý basqarmasynyń basshysy Vıacheslav Dýdnık bul oqıǵadan keıin Akýsherlik isi, gınekologııa jáne perınatologııa ǵylymı ortalyǵynyń mamandary osy aýdannyń dárigerlerine semınar ótkizgenin habarlady.
Avtor: Janna Mýsabaeva
