Qostanaı oblysynda bıyl 4 mln gektardan dándi daqyl jınalady

NUR-SULTAN.QazAqparat – Bıyl Qostanaı oblysy daqyldardy ártaraptandyrý boıynsha joǵarǵy kórsetkishke qol jetkizdi. Bul týraly Úkimet otyrysynda Qostanaı oblysynyń ákimi Arhımed Muhambetov aıtty, dep habarlaıdy QazAqparat tilshisi.

Arhımed Muhambetov Úkimet basshysyna Qostanaı oblysyndaǵy egin jınaý jumystarynyń barysy týraly baıandady. Onyń aıtýynsha, oblys boıynsha dándi daqyldar 4 mln 51 myń gektardan jınalady. Sonymen qatar daqyldardy ártaraptandyrýda joǵarǵy kórsetkishke qol jetkizdi

«Maıly daqyldar 640,5 myń gektarǵa egildi, bul ótken jylǵydan 130,4 myń gektarǵa artyq. Sońǵy 4 jylda ártaraptandyrý sheńberinde maıly daqyldar alqaby 289,1 myń gektarǵa ulǵaıtyldy. 10 tamyzdan bastap sharýashylyqtar egin jınaýǵa kiristi, búgingi kúni 591,4 myń gektar alqapta dándi daqyldar bastyryldy. Bıyl aýyl sharýashylyǵy qurylymdaryn qarjylandyrý aıtarlyqtaı ósti. Kóktemgi dala jáne egin jınaý jumystaryn júrgizýge 29,3 mlrd teńge alyndy. «Agrarlyq nesıe korporatsııasy» aktsıonerlik qoǵamy arqyly 22,5 mlrd teńge bólindi. Onyń ishinde 3,2 mlrd teńge qarapaıym zattar ekonomıkasy baǵdarlamasy boıynsha alyndy», - dedi oblys basshysy.

Arhımed Muhambetov aıtqandaı, Qostanaıda egin jınaý jumystaryna 9,1 myń kombaın jumyldyrylǵan. Oblys taýar óndirýshileriniń tehnıkalyq jaraqtandyrylýyn ulǵaıtýǵa «AgromashHoldıng KZ» aktsıonerlik qoǵamy aıtarlyqtaı qoldaý kórsetýde. 2019-2020 jyldary kásiporyn 445 «Esil» kombaınyn jasap shyǵarǵan.

«Taýar óndirýshiler janar-jaǵar maımen qamtamasyz etilgen, qor kólemi jetkilikti. Ónim syıymdylyǵy 8,2 mln tonnaǵa arnalǵan oryndarda saqtalady. Jalpy, barlyq jumystar shtattyq rejımde júrgizilýde, suraqtarymyz joq», - dep túıdi aımaq ákimi.