Qostanaı oblysynda birqatar shekteýler engizildi
Jańa qaýly aıasynda qalaaralyq, oblysaralyq turaqty avtobýstardyń qozǵalysyna tyıym salynǵan. Bul rette qaladaǵy qoǵamdyq kólik burynǵydaı tolyq jumys isteıdi. Sondaı-aq, taksı men azamattardyń jeke kólikteriniń qozǵalysyna da ruqsat etilgen, biraq 65 jastan asqan azamattardyń Qostanaı oblysynyń eldi mekenderi aýmaǵynda júrýine shekteý qoıyldy, egde jastaǵy azamattar tek dúkenge azyq-túlik alýǵa, dárihanaǵa, emdeý uıymdaryna, qoqys shyǵarýǵa jáne janýarlardy serýendetýge shyǵa alady.
«Kópshilik kóretin sharalar, forýmdar, konferentsııalar, sondaı-aq otbasylyq, estelik sharalardy, keńester men otyrystardy ótkizýge tyıym salynady. Sondaı-aq «Ashyq» jobasyna qatyspaıtyn oıyn-saýyq mekemeleri (kórmeler, karaoke, bılıard, kalıan, kompıýter klýbtary, túngi jáne oıyn klýbtary, boýlıng klýbtar, batýttar, jabyq ǵımarattarda balalarǵa arnalǵan oıyn alańdary, attraktsıondar jáne t.b), banket zaldary, býkmekerlik keńselerdiń qyzmeti toqtatylady. Sondaı-aq kınoteatrlar, teatrlar, mádenıet úıleri, kontserttik zaldar,fılarmonııalardyń jumysyna tyıym salynǵan, al «Ashyq» jobasyna qatysatyn mekemeler adamdardy otyrǵyzatyn oryndardyń jalpy sanynan 30 paıyz asyrmaýy tıis», - delingen jańa qaýlyda.
Sonymen qatar, kórermen jınaıtyn sporttyq sharalardy ótkizýge de tyıym salyndy. «Ashyq» jobasyna qatysýshy nysandar sporttyq sharalar, sonyń ishinde Qazaqstan Respýblıkasynyń chempıonattary men respýblıkalyq jarystardy (biryńǵaı respýblıkalyq kúntizbe boıynsha) adam sanyn 20 paıyzdan asyrmaı ótkizedi. Ekskýrsııalyq, korportıvtik, tabıǵatqa toptyq jáne kórnekti jerlerdi tamashalaý saparlaryna tyıym salynǵan, bul sharalarǵa úsh adam nemese bir otbasynan úsh adamnan artyq jınalmaýy tıis.
Jumys isteıtin azamattarǵa keletin bolsaq, jańa qaýly aıasynda óndiris kásiporyndary, ashyq aýada jumys isteıtin qurylys, aýyl jáne balyq sharýashylyǵy, mal sharýashylyǵy nysandarynyń qyzmetine tyıym salynǵan joq. Keńse, memlekettik organdar, kvazımemlekettik sektor organdary, ulttyq kompanııalar, ózge de uıymdar, sondaı-aq kásipkerlik sýbektileriniń qyzmetine tyıym salynǵan joq, bul rette qyzmetkerlerdiń 80 paıyzynan kem emes bóligi qashyqtan jumys atqarady.
«Qashyqtan jumys isteý formatyna birinshi kezekte COVID-19 vırýsyna qarsy ekpe almaǵandar men sońǵy alty aıdyń ishinde COVID-19 vırýsymen aýyrmaǵandar aýystyrylady», - delingen qaýlyda.
Jańa qaýly 5 shildeden bastap kúshine enedi.
