Qostanaı oblysynda birqatar mekeme basshylary para aldy degen kúdikke ilindi

QOSTANAI. QazAqparat – Qostanaı oblysynyń Sybaılas jemqorlyqqa qarsy kúres qyzmeti Rýdnyı jáne Arqalyq qalalarynda qurylys bólimderiniń basshylaryna qatysty sybaılas jemqorlyq qylmys jasady degen kúdik boıynsha sotqa deıingi tergeýdi bastady.

Bul týraly elimizdiń sybaılas jemqorlyqpen kúres qyzmetinen habarlandy.

Rýdnyı qalasy ákimdiginiń «Rýdnyı qalalyq qurylys bólimi» MM basshysy «Rýdnyı qalasyndaǵy shaǵyn aýdandardy gazdandyrý» nysany boıynsha qurylys jumystary shartyn bir kózden alý tásilimen jasaǵany úshin jáne oryndalǵan jumystardyń aktilerin kedergisiz qabyldaǵany úshin JShS ókilinen quny 10,4 mln. teńge bolatyn 2019 jylǵy «Nissan Qashqai» avtokóligi túrinde para aldy degen kúdik keltirilip otyr.

Sonymen qatar, «Arqalyq qalasy ákimdiginiń qurylys, sáýlet jáne qala qurylysy bólimi» MM basshysyna qatysty «Vostochnyı kentiniń sý qubyry jelileriniń qurylysy» nysany boıynsha 145 mln. teńge somasynda oryndalǵan jumystardyń aktilerin kedergisiz qabyldaý úshin joǵaryda kórsetilgen JShS ókilinen 250 myń teńge somasynda para aldy degen kúdikpen sotqa deıingi tergeý bastaldy.

Atalǵan laýazymdy tulǵalar QІJK 128-b. tártibinde ustalyp, Qostanaı q. PB ÝUI-ǵa qamaldy.

Sondaı-aq, joǵaryda atalǵan laýazymdy tulǵalarǵa para berdi degen kúdikpen JShS ókiline qatysty da tergeý júrgizilip jatyr.

Sotqa deıingi tergeý jalǵasýda.

Kúdiktilerge qatysty túpkilikti sheshimdi olardyń kinásiniń deńgeıin anyqtaý arqyly sot qabyldaıtyn bolady.