Qostanaı oblysynda birinshi ret tize býyndaryna endoprotez otasy jasaldy
QOSTANAI. QazAqparat – Qostanaı qalalyq aýrýhanasynda tize býyndaryn endoprotezdeý boıynsha alǵashqy joǵary tehnologııalyq ota jasaldy, dep habarlaıdy QazAqparat oblystyq densaýlyq saqtaý basqarmasynyń baspasóz qyzmetine silteme jasap.
Mundaı ota Qostanaı oblysynda buryn-sońdy jasalmaǵan. Jaýapty jumysty joǵary sanatty dáriger, Almaty qalasy jedel járdem aýrýhanasynyń bólimshe meńgerýshisi Vladımır Semenov júrgizdi. Ol jergilikti hırýrg-travmatologtarǵa sheberlik sabaǵyn da ótkizdi. Dáriger dál osyndaı myńnan astam ota jasaǵan.
«Qostanaı qalalyq aýrýhanasy endoprotezdeý boıynsha óz betinshe jumys isteýge daıyn. Muny dárigerler men medbıkelerdiń daıyndyǵynan bilýge bolady. Men Qostanaıǵa áriptesim, qalalyq aýrýhananyń travmatologııa bólimshesiniń meńgerýshisi Erık Qoıanbaevtyń shaqyrtýymen keldim. Endi qostanaılyq dárigerler mundaı qıyn otany ózderi de jasaı beredi dep oılaımyn. Tize býynynyń aýrýymen júgingen turǵyndar da jeterlik. Tek iske kirisý qajet», - deıdi Vladımır Semenov.
Sonymen, tize býyndaryn endoprotezdeý degenimiz ne? Vladımır Semenov muny zaqymdanǵan býyndy jasandy býynǵa almastyrý dep túsindirdi. Jasandy býyn joǵary sapaly medıtsınalyq qorytpadan turady. Endoprotezderdi paıdalaný merzimi – 20 jyl. Bul joǵary tehnologııalyq medıtsınalyq kómek býyny qatty zaqymdanǵan emdelýshilerge kórsetiledi.
«Endoprotezdeý – zaqymdanǵan býyndy almastyrý protsesiniń bir bóligi ǵana. Ota jasalǵannan keıin patsıent fızıoterapııalyq emdeý men dene shynyqtyrý kýrsynan ótýi tıis. Qozǵalys fýnktsııasyn jyldam qalpyna keltirý úshin bul sharalardyń mańyzy zor. Jospar boıynsha qalalyq aýrýhanada jyl sońyna deıin 50 adamǵa jasandy tize býyny salynady. Bul – tehnıkalyq turǵyla kúrdeli operatsııa. Biz úshin de, dárigerler men medbıkeler úshin de úlken synaq. Qysqasy, biz bul synǵa daıynbyz»,- dep túsindirdi qalalyq aýrýhananyń travmatologııa bólimshesiniń meńgerýshisi Erık Qoıanbaev.
Taǵy da aıta keteıik, tize býyndaryn endoprotezdeý boıynsha joǵary tehnologııalyq ota óńirde búgin birinshi ret jasalyp otyr.
