Qostanaı oblysynda bir táýlikten beri órt sóndirilip, adamdar qaýipsiz aýmaqqa kóshirilip jatyr
Qostanaı oblysynda orman órti 2 qyrkúıek kúni bastaldy. Saǵat 15:10-da Basaman jáne Semıozernoe sharýashylyqtarynyń aýmaǵynda aǵash pen qurǵaq shóp órtendi.
«Osy kúni bir jaǵy kún 36 gradýsqa deıin qatty ysyp, jel sekýndyna 26 metrge deıin kúsheıip, meteorologııalyq jaǵdaı kúrdelene tústi. Órtengen aýmaqtyń kólemi 9 400 gektardy qurady. Ormanyń jalpy aýmaǵy 70 myń gektar»,-dedi TJM ókilderi.
Oqıǵa ornynda jedel shtab qurylyp, onyń quramyna QR Tótenshe jaǵdaılar mınıstri ıÝrıı Ilın men ózge de birqatar memlekettik organdardyń basshylary kirdi. Órtti sóndirýge Qostanaı, Aqmola, Qaraǵandy jáne Soltústik Qazaqstan oblystarynyń jeke quramy jumyldyryldy.
Órt orman alqabynan eldi mekenderge tarap, jaǵdaıdy kúrdelendire tústi. Osyǵan baılanysty negizgi kúsh Amanqaraǵaı men Novonejınka eldi mekenderin órtten qorǵaýǵa jumyldyryldy.
Ozernoe aýylynan 1841 adam, Amanqaraǵaı aýylynyń soltústik bóliginen 1000 adam, Kalınıno aýylynan 228, Lesnoe aýylynan 363 adam qaýipsiz jerge kóshirildi.
Evakýatsııalanǵandardyń barlyǵy Áýlıekól orta mektebi men mektep-ınternatyna ornalastyryldy jáne olar tamaqpen qamtamasyz etildi.
Keshirek ıÝrıı Ilın órttiń eldi mekenderge tarap, órt sóndirýshiler 60 úıdi órtten aman alyp qalýǵa kúsh salyp jatqanyn habarlady.
Órtten zardap shekkkenderge aımaqta shuǵyl jeli iske qosylyp, psıhologtardyń jumysy uıymdastyryldy.
Joldyń nashar kórinýine baılanysty bılik ókilderi «Qostanaı- Áýlıekól» trassasyn jaýyp tastady.
Qostanaı oblysyna 15 avtotsısterna, eki vahta avtobýsy, 1 qyzmettik kólik, Nur-Sultan qalasynyń Tótenshe jaǵdaılar departamentinen 98 adam jiberilgeni habarlandy.
«Saǵat 22:00-degi jaǵdaı boıynsha Áýlıekól aýdanyna Aqmola oblystyq Tótenshe jaǵdaılar departamentinen 9 tehnıka men 50 adam keldi. Soltústik Qazaqstannan 6 tehnıka men 50 adam, qosymsha Atbasar men Novoıshımka aýyldarynan eki órt sóndirýshi poıyz keldi. Saǵat 21:00-de №51 jáne №82 jolaýshylar poıyzdary toqtaldy»,-dep habarlady TJM jedel shtabynan.
Jergilikti ákimdik qazir jergilikti deńgeıde tótenshe jaǵdaı jarııalaý máselesin oılastyryp jatyr.
Qostanaı oblysynda sondaı-aq Memleket basshysy Qasym-Jomart Toqaev qatysýy kerek bolatyn Ahmet Baıtursynulynyń 150 jyldyǵymen baılanysty is-sharalar da keıinge qaldyryldy.
Memleket basshysy munda endi basqa maqsatpen, ıaǵnı órtpen kúres baǵytynda atqarylyp jatqan jumystarmen tanysý úshin keledi.
Úkimet tótenshe jaǵdaıdyń saldarymen kúreske qarjy bóletin bolady.
Janna Musabaeva
