Qostanaı oblysynda barlyq baǵyttar boıynsha joldar jabyldy
QOSTANAI. QazAqparat - Aýa raıynyń kúrt sýytýyna baılanysty Qostanaıda 22 qańtar kúni dızelmen júretin kólikter úshin barlyq baǵyttar boıynsha jol jabyq, dep habarlady oblystyq jolaýshylar kóligi jáne avtomobıl joldary basqarmasy.
«Qostanaı oblysyndaǵy joldardyń barlyǵy dızeldi otynmen júretin kólikter úshin jabyq. Oblystyq mańyzy bar joldarǵa arnaıy qar tazalaıtyn tehnıkalar jumyldyrylǵan. Barlyq jol qyzmetteri kúsheıtilgen tártipke aýystyryldy. Kún raıy -38 gradýsqa deıin tómendeıdi dep kútilýde», - dep málim etildi vedomstvoda.
Al respýblıkalyq mańyzǵa ıe joldarǵa jaýap beretin «QazAvtoJol» AQ oblystyq fılıalynyń habarlaýynsha, 21 qańtar kúni saǵat 23:00-den bastap dızeldi otynmen júretin kólikter úshin «Qostanaı-Uzynkól» (SQO shekarasyna deıin), «Qostanaı-Sarykól» (SQO shekarasyna deıin), «Qostanaı-Áýlıekól» (Aqmola oblysynyń shekarasyna deıin) baǵyttarynda jol jabylǵan.
Eske salsaq, aýa raıynyń kúrt sýytýyna baılanysty Qostanaı oblysynda birinshi aýysymdaǵy oqýshylarǵa sabaq bolmady.
