Qostanaı oblysynda azyq-túlik baǵasyn turaqtandyrý qory quryldy
Aldymen basqarma basshysy Jansultan Táýkenovtiń baıandamasy tyńdaldy. Onyń aıtýynsha, aýyl sharýashylyǵy - oblys ekonomıkasynyń negizgi baǵyty sanalady. Óńirlik ónimdegi úlesi 11,2%-ti quraıdy. Salada 125 myńnan astam adam jumys isteıdi.
«Bıyl ósimdik sharýashylyǵy úshin aýa raıy qolaısyz, qatty qurǵaqshylyq boldy. Soǵan baılanysty jalpy ónim kólemi tómendedi. Jazdyq egis kólemi 4,7 mln ga qurady. Dándi daqyldarmen - 4 mln ga jýyq, onyń ishinde 3,3 mln ga bıdaı egisterimen qamtylǵan. Egis alqaptarynyń qurylymyn ártaraptandyrýdy jalǵastyrý sheńberinde maıly daqyldar egistigi 510 myń ga deıin ulǵaıtyldy, bul ótken jylǵy deńgeıden 80,5 myń ga artyq. Egin jınaý jumystarynyń qorytyndysy boıynsha 3 mln tonna astyq bastyryldy, oblys boıynsha bıdaı 7,6 tsentnerden tústi. Jınalǵan astyq kólemi sharýashylyqtarǵa birinshi kezektegi qajettilikterdi jabýǵa, mal qystatýdy júrgizýge, aldaǵy jyldyń egis jumystaryna daıyndalýǵa múmkindik beredi. Bul rette tuqym tolyq kólemde qambaǵa quıyp alyndy. Qurǵaqshylyqtan zardap shekken sharýashylyqtarǵa memlekettik qoldaý kórsetildi. «QazAgro» ulttyq basqarý holdıngi» aktsıonerlik qoǵamy qarjy ınstıtýttary aldyndaǵy mindettemelerdi 2020 jyldyń jeltoqsanyna deıin uzartýǵa múmkindik berdi», - dedi J.Táýkenov.
Bıyl bıdaı qunynyń ósýine baılanysty jergilikti bıýdjetten áleýmettik nannyń baǵasyn turaqtandyrý úshin 300 mln teńge qosymsha bólindi. «Asalııa» jaýapkershiligi shekteýli seriktestiginen qurǵaqshylyq aımaǵyndaǵy óńir naýbaıhanalaryn 1-surypty unmen úzdiksiz qamtamasyz etý úshin 3,2 myń tonna un satyp alyndy. 1 keli unnyń baǵasy 94 teńgege shyqty. Bólshek saýdada áleýmettik nan 83 teńgeden ótkizilip keledi. Oblystyń 4 qalasy men 6 aýdanynda táýligine 22,4 tonna un jetkiziledi. Qurǵaqshylyq aımaǵyna kiretin qalalar men aýdandardyń ákimdikteri nan baǵasyn bir qalypta ustap turý úshin úshjaqty memorandýmdar jasasty. Sondaı-aq, oblysta 1 mlrd teńge somasyna azyq-túlik taýarlarynyń turaqtandyrý qory quryldy, áleýmettik mańyzy bar 19 azyq-túlik taýarynyń ishinen 14 qajetti taýar ataýy irikteldi.
Endigi basty mindetterdiń biri – qys mezgilinde analyq mal basyn saqtaýdy qamtamasyz etý. Ońtústiktegi 8 aýdannyń kásiporyndaryn qoldaý maqsatynda analyq iri qara mal basyn ustaý úshin bıýdjetten 378,6 mln teńge bólindi.
«Búginde aýyl sharýashylyǵy qurylymdary «Sybaǵa» baǵdarlamasy boıynsha 703 bas iri qara mal satyp aldy. 24 asyl tuqymdy reprodýktor arqyly 5 myńnan astam qara mal ótkizildi. Onyń jartysynan astamy oblys sheginen tys aımaqtarǵa eksporttaldy. Jalpy 1700 tonnadan astam sıyr eti eksportqa shyqty», - dep málimet berdi Jansultan Táýkenov.
Jıynda mashına-traktor parki týraly aıtyldy. Aımaqta 23,7 myń traktor, 9,6 bıdaı jınaıtyn kombaın, 22 myń ekkish bar. Kelesi jyldan bastap traktor parki memleketten sýbsıdııalanbaq. Sol sebepti jergilikti ákimdikter sharýashylyq basshylarymen jıyn ótkizip, baǵdarlamaǵa qatysýǵa ótinim jazýlary tıis.
Jıyndy qorytyndylaǵan Arhımed Muhambetov aýdan-qala ákimderine tapsyrma berdi.
«Jergilikti kásipkerlerdi jınap, memlekettik baǵdarlamalar, sýbsıdııadaǵy ózgerister týraly túsindirińizder. Kóbi bıznesti qoldaýdyń tetikterin bilmeı jatady. Buǵan birinshi kezekte atqarýshy organdar jaýapty. Aýyl sharýashylyǵy basqarmasy, usynystaryńyzdy tıisti mınıstrlikke jetkizińizder. Oblystyń tıimdi degen jobalaryn usyný qajet. Usynys jasaýǵa eki apta ýaqyt beremin», - dedi Arhımed Muhambetov.
