Qostanaı oblysynda azyq-túlik baǵasy qymbattady
QOSTANAI. QazAqparat - Qostanaı oblysynda jyl basynan beri áleýmettik mańyzy bar ónimderdiń baǵasy qymbattaǵan, dep habarlaıdy QazAqparat tilshisi.
Deı turǵanmen, qyrkúıek aıynyń basynda azyq-túliktiń baǵasy 0,2%-ǵa kemigen. Bul týraly oblystyq ákimdikte ótken apparat májilisinde aýyl sharýashylyǵy basqarmasynyń basshysy Darhan Ábdikárimov aıtty.
«Azyq-túlik baǵasy ósti. Sondaı-aq qolda bar málimetterge sáıkes, qazirgi kezde keıbir ónimder: un- 7,5%, qaraqumyq -11,2%, suıyq maı - 12,9%, qant -2%,jumyrtqa 33,4%-ǵa kemidi»,- dep málim etti basqarma basshysy.
Qostanaı dúkenderinde sıyr eti - 18,5%, kartop -13%, taýyq eti - 11,3%, jýa - 31,6%, kúrish 5,9%-ǵa qymbattap otyr.
«Óńirde jemshóp quny sharyqtap ketti. Tıisinshe, sıyr etiniń de baǵasy sonshalyqty artty. Oǵan qosa eldiń basqa oblystaryna eksportqa shyǵaryp otyrmyz. Al kartopqa degen suranys joǵary. Sol sebepti ónim óndirýshiler baǵany turaqty ustap otyrǵan joq. Munyń syrtynda jyl basynan beri Ózbekstanǵa 2400 tonna, Reseıge 71 myń tonna kartop ótkizildi», - dep túsindirdi Ábdikárimov.
Vedomstvo basshysynyń sózine sensek, qazir kartoptyń kelisi - 87 teńge. Al sábiz 105 teńge bolsa, qyryqqabat 53 teńgeni quraıdy. Qanttyń baǵasy turaqty - 214 teńge.
Jıyndy qorytyndylaǵan Arhımed Muhambetov aýdan, qalalardyń ákimderine azyq-túlik baǵasyn baqylaýda ustaýǵa tapsyrma berdi. Onyń sózinshe, búginde áleýmettik mańyzdy ónimder qoryn arttyrý úshin oblysta 682 memorandýmǵa qol qoıylǵan. Endi osy kelisimderdiń negizinde qarasha-sáýir aılary aralyǵynda áleýmettik mańyzdy ónimderdiń baǵasyn qalypqa keltirý kerek.
