Qostanaı oblysynda áıelder kúshteriniń alıansy quryldy

QOSTANAI.QazAqparat – Qostanaıda áıelder kúshteriniń alıansy jumysyn bastady, dep habarlaıdy QazAqparat. Bul týraly Óńirlik kommýnıkatsııalar qyzmetinde ótken baspasóz májilisinde belgili boldy.

«Qazaqstan halqynyń basym bóligi áıelder bolǵanymen, mańyzdy sheshimder qabyldanǵan kezde áıelder is júzinde tys qalyp jatady. Sheshim qabyldaýǵa kelgende áıelderdiń belsendiligi baıqalmaıdy. Genderlik teńgerim saqtalmaıdy. Sondyqtan Qazaqstannyń isker áıelder qaýymdastyǵy áıelder kúshteriniń alıansyn ashýdy usyndy. Ókildik ár aımaqta ashyldy», - deıdi Qostanaı oblysy boıynsha saıasatker áıelder klýbynyń tóraıymy Rımma Bekturǵanova.

Bul uıymnyń negizgi mıssııasy – elimizdegi áıelderdiń ómir súrý sapasy men ál-aýqatyn arttyrý.

«Dálirek aıtqanda, áıelderdi mańyzdy sheshim qabyldaý deńgeıine kóterý, olardyń ekonomıkalyq múmkindikterin keńeıtý, zorlyq-zombylyq deńgeıin tómendetý, alıment tóletý máselelerin alǵa tartamyz. Biz qıyn jaǵdaıda qalǵan áıelderge kómek kórsetýge daıynbyz, zańgerler, psıhologtar jáne basqa da mamandar bar», - deıdi jeke sot oryndaýshylary alqasynyń tóraǵasy, áıelder kúshteri Alıansynyń basqarma múshesi Nesibeli Básenova.

Mundaı jumys buǵan deıin de isker áıelder qaýymdastyǵynda júrgizilgen. Al áıelder kúshteriniń alıansy ony is júzinde nyqtaýǵa múmkindik bermek.