Qostanaı oblysynda aýyl balalarynyń tanymdyq lageri ashylady
QOSTANAI. QazAqparat – Qostanaı oblysynda Elbasy Qorynyń «El úmiti» bastamasyn júzege asyrý maqsatynda aýyl balalaryna arnalǵan «Daryn» jazǵy demalys orny ashylady, dep habarlaıdy QazAqparat oblystyq bilim basqarmasyna silteme jasap.
Tanymdyq-saýyqtyrý baǵdarlamasy boıynsha jumys isteıtin «Daryn» lagerine aýyldarda oqıtyn daryndy oqýshylar shaqyrtylady. Tájirıbeli IT-mamandar jumys isteıtin lagerde balalar belsendi demalys sharalarymen qatar, ǵylymı tehnologııaǵa qatysty qyzyqty sabaqtar men oıyn-jattyǵýlarǵa qatyspaq.
«Tanymdyq lager óńirdiń qabiletti balalaryn anyqtap, durys baǵyt-baǵdar berýdi maqsat etedi. «Daryn» lagerinen tys, jazǵy demalys ýaqytynda balalardyń robototehnıka men IT salasyndaǵy bilimin qashyqtan damytý josparlanyp otyr. Oqýshylar beınerolıkter, býktreılerler, vaınalar, vırtýaldy ekspedıtsııa, ekskýrsııa, saıahat jasap, ınteraktıvti mektepterdegi master-klastar men qoıylymdarǵa, jazǵy onlaın-lagerlerge qatysady», - dedi oblystyq bilim basqarmasynyń basshysy Vasılıı Tsymbalıýk.
Jalpy, sońǵy eki jyl ishinde aımaq mektepterinde jergilikti metsenattardyń qoldaýymen jalpy somasy 325,4 mln teńgege 30 robototehnıka kabıneti jáne 65 IT-synyby ashylǵan. Endigi maqsat – atalmysh synyptardyń tolyqqandy jumys isteýin qamtamasyz etý.
