Qostanaı oblysynda aýdan ákiminiń orynbasary týysyn jumysqa alǵan
Memlekettik qyzmet isteri jáne sybaılas jemqorlyqqa qarsy is-qımyl agenttigi mamandary Qostanaı oblysynyń birqatar mekeme-uıymdaryna tekserý júrgizgen. Nátıjesinde, keı aýdandarda jaqyn týystardyń birge qyzmet istep júrgeni anyqtaldy.
«Qostanaı oblysynda memlekettik qyzmette múdde qaıshylyǵynyń aldyn alý jumystary 2016 jyldan bastap júıeli túrde júrgizilip keledi. Jaqyn týystardyń, jekjattardyń birlesken jumysy múddeler qaqtyǵysyna ákeledi. Týystyq baılanys arqyly jumysqa qabyldaný faktileri Denısov jáne Fedorov aýdandarynda tirkelgen. Mysaly, Denısov aýdany ákiminiń orynbasary júrgizýshi retinde óziniń týysyn jumysqa alǵan. Ol adam materıaldyq shyǵyndarǵa jaýapty sanalady. Janarmaı alýǵa, qyzmettik avtokóliktiń qosalqy bólikterine ótinim beredi. Múddeler qaqtyǵysyn boldyrmaý maqsatynda júrgizýshi óz erkimen jumystan ketti», - delingen vedomstvonyń habarlamasynda.
Departamentte atap ótkendeı, tanys-tamyr arqyly jumysqa ornalasý áreketteri qyzmet sapasyna teris áser etedi. Sonymen qatar, jaýapty memlekettik laýazymdy atqaratyn adamdarǵa, memlekettik fýnktsııalardy oryndaýǵa ýákilettik berilgen adamdarǵa teńestirilgen adamdarǵa, eger múddeler qaqtyǵysy oryn alǵan bolsa, laýazymdyq mindetterin júzege asyrýǵa tyıym salynady.
