Qostanaı oblysynda aýdan ákimi 4 jylǵa sottaldy
QOSTANAI. QazAqparat - Búgin Qarabalyq aýdandyq soty burynǵy aýdan ákimine qatysty qylmystyq isti qarap, úkim shyǵardy, dep habarlaıdy QazAqparat oblystyq sottyń baspasóz qyzmetine silteme jasap.
Qarabalyq aýdanynyń burynǵy ákimi Qanat Ǵabdýlın QR QK 190-baby, 3-bóligi, 2,3-tarmaqtary, 28-baptyń 4 bóligi, 367-baptyń 2 bóligi boıynsha aıyptalǵan bolatyn.
Esterińizge sala keteıik, aǵymdaǵy jyldyń naýryz aıynda Qarabalyq aýdanynda Qostanaı oblysynyń tekserý komıssııasy memlekettik aýdıt júrgizdi. Aýdıt Qarabalyq aýdany ákimdiginiń bilim bólimi, TKSh, jolaýshylar kóligi jáne avtomobıl joldary, qarjy bólimderinde júrgizildi. Osy ýaqyttarda Ǵabdýlın óz orynbasaryna TKSh bólimi basshysy men Qarabalyq kenti ákiminen 300 myń teńge qarajat alýdy tapsyrady. Tıisinshe, aýdıtorlyq tekserý júrgizý kezinde qujattardy durys ótkizip berýge ýáde etken.
Sot úkimimen oǵan tórt jylǵa bas bostandyǵynan aıyrý jazasy taǵaıyndaldy. Oǵan qosa onyń jeke múlikteri tárkilenedi. Eks-ákim sot zalynda qamaýǵa alyndy.
Úkim zańdy kúshine engen joq.
