Qostanaı oblysynda aýa raıyna baılanysty arnaıy top quryldy
QOSTANAI. QazAqparat – Qostanaı oblysynda aýa raıynyń kúrt buzylýyna baılanysty arnaıy top quryldy, dep habarlaıdy QazAqparat oblystyq TJD ishki jáne syrtqy kommýnıkatsııalar toby qyzmetine silteme jasap.
Vedomstvo málimetine súıensek, 22-23 qańtar kúni aımaqta 4 qutqarý operatsııasy ótti.
«Qutqarý jumystary Amangeldi, Qostanaı, Áýlıekól jáne Altynsarın aýdandarynda júrgizildi. Órt sóndirý qyzmeti jáne avarııalyq-qutqarý jumystary otrıadynyń jáne aýdandardyń tótenshe jaǵdaılar bólimderiniń kúshimen qar qursaýynda qalǵan 22 adam qutqarylddy. 9 avtotehnıka joldardyń qaýipsiz bóligine shyǵaryldy», – delingen departamenttiń baspasóz habarlamasynda.
Osy kúnderi óńirde qardyń mol túsýine baılanysty oblystyq, aýdandyq mańyzy bar joldardy tazalaý úshin jol tehnıkalary qoldanylyp, arnaıy top quryldy. Degenmen qazirgi ýaqytta myna avtojol baǵyttaryna ýaqytsha shekteý qoıyldy:
Qoıbaǵar-Qarasý-Sevastopol, Uzynkól-Sarykól, Qarasý-Bolshaıa Chýrakovka, Rýdnyı-Fedorovka, Maılın-Varvarınka-RF shekarasy, Sarykól-Bolshıe Dýbravy.
R-36 Qostanaı-Áýlıekól-Surǵan, Ekaterınbýrg-Almaty, Qarabutaq-Rýdnyı, Denısovka - RF shekarasy
«23 qańtarda oblys aýmaǵynda dabyldy eskertý jarııalandy, boran soǵady, keı jerlerde tuman túsedi, kóktaıǵaq bolady. Jel ońtústik-batystan 15-20 m/s, keı jerlerde 23-28 m/s, túnde ekpini 30 m/s. Eskertýlerge qaramastan avtokólik ıeleri eldi mekenderden uzaq qashyqtyqqa shyǵady. Mundaıdan bas tartyńyzdar. Óz ómirińizge qaýip tóndirmeńiz! Qajet bolǵan jaǵdaıda «112» nómirine qońyraý shalyńyz»,- deıdi TJD ókilderi.
