Qostanaı oblysynda ataýly áleýmettik kómekke ótinim qabyldana bastady

QOSTANAI. QazAqparat – AÁK alýǵa qajetti qujattardy onlaın tapsyrýǵa bolady. Bul týraly Qostanaı oblysy ákimdiginiń jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Maksım Ýstınov málimdedi, dep habarlaıdy QazAqparat.

Ataýly áleýmettik kómek alýǵa ótinimder ekinshi toqsanǵa qabyldanady.

«1 sáýirden bastap ataýly áleýmettik kómekke ótinish berýshi ETsQ-men elektrondy úkimet portalyna kirip, AÁK-ke ótinim bere alady. Múmkindigi joq, ıaǵnı kompıýteri nemese ınterneti joq adamdar jumyspen qamtý bólimine, jumyspen qamtý ortalyǵyna nemese ózderi turatyn aýyldyq okrýg ákimdigine júgine alady. Nemese ózine-ózi qyzmet kórsetý buryshtaryna baryp, osy qyzmetti alýǵa bolady», – dedi M. Ýstınov.

Óńirlik kommýnıkatsııalar qyzmetinde atap ótkendeı, onlaın ótinim berý koronavırýs ınfektsııasynyń taralýyna jol bermeý maqsatynda jasaldy. Qujattar egov.kz. elektrondyq úkimet portaly arqyly qabyldanady.